Respublika eşmäkärläreneñ qorıltayı daimi ütep kilä Tatarstanda. Soñğı märtäbä ul 3 yıl elek Çallıda uzğan ide. Bu yulı isä biznes belän şöğellänüçe tatarstanlılar Qazanda cıyıldı. Çara küptän tügel genä açılğan zur häm zamança Korston üzägendä ütte. Könneñ berençe yartısında eşmäkärlär seksiälärgä bülenep eşläde. Alarda respublika eşmäkärläre aldında torğan problemalar turında süz bardı. Ayırım alğanda, korrupsiä, anıñ belän köräş yulları, xakimiätlär belän xezmättäşlek itä, alardan tege yäki bu problemalarnı xäl itüdä yärdäm alu kebek mäs’älälär turında eşlekle söyläşü buldı qorıltayda. Monnan tış, xakimiät tarafınnan kontrol’ itä torğan oyışmalarnıñ mönäsäbäte, ere häm keşe eşmäkärlärneñ törle xäldä buluı, üz eşeñne başlap cibärer öçen küpsanlı dokumentlarnı cıyu qıyınlıqları xaqında da söyläştelär cıyın wäkilläre. Annarı soñ qorıltaynıñ plenar öleşe uzdı. Anda Tatarstan prezidentı Mintimer Şäymiev tä kilde.
Qorıltay ütkän Korston yanında piket ta oyıştırıldı çärşämbe könne. Anı Qazan xakimiäteneñ eşmäkärlärgä mönäsäbäte belän qänäğät bulmawçılar oyıştırdı. Döresräge, keçe häm urta eşmäkärlek gil’diäse. Alar başqalada uramdağı keçkenä kibetlär, lareklarnıñ eşçänlegen yabu telägenä qarşı çığa. Piketnı oyıştıruçılar üzläreneñ rizasızlığın respublika citäkçelegenä kürsätergä teläde. Läkin qorıltayda bu xaqta söyläşü bulsa da, ul seksiä utırışında ğına uzdı. Ä zur qunaqlar qorıltaynıñ ikençe öleşenä genä kilde.
Läkin problemalarnı piket yäki başqa şundıy qarşılıq aksiäläre yärdämendä çişü mömkinlegenä ışanmawçı eşmäkärlär dä bar. Mäsälän, inde küp yıllar eşmäkärlek belän şöğellänüçe Ğäliä Miñnullina. Ä menä meditsina ölkäsendä eşmäkärlek belän şöğellänüçe Räşit Vil’danov isä, alda torğan mäs’älälärne xäl itüdä härkem berençe çiratta üzenä tayanırğa tieş, dip sanıy. Alay da, Räşit Vil’danov fikerençä, qorıltaylarnıñ faydası yuq tügel. Ul üze Tatarstan eşmäkärläreneñ berençe cıyınında qatnaşuçı bularaq, anda qaralğan mäs’älälär çişelde, dip sanıy.
Xäyer, Räşit Vil’danov ta, aldaraq fikerlären beldergän Älfiä Miñnullina da, başqa eşmäkärlär dä xäzerge köndä dä çişeläse problemalar şaqtıy dip sanıy. Alar arasında eşmäkärlärgä caylı kredit birü, arenda bäyälären köyläw mäs’äläse, üzläre eşlägän binalarnı satıp alu mömkinlege, cirle eşmäkärlärgä östenlek birü kebekläre ayıruça möhim bulıp tora. Läkin qorıltay ütkärep kenä alarnıñ barısı da xäl itelügä ışanuçı keşelär bik az täcribäle häm küpne kürgän eşmäkärlär arasında.
Gölnaz İlgizär