Başqortstanda yäşäwçe iñ kürenekle tatar sänğat'kärläreneñ berse, tamaşaçılarğa kübräk “Kätük” säxnä quşamatı belän mäğlüm bulğan Äxät Urazmätovqa 75 yäş tuldı. Şuşı uñaydan anıñ yubiley çaraları başlana. İñ töp tantana Başqortstan Respublikası Xökümäteneñ maxsus färmanı belän şuşı comğağa tögällände. Äxät ağanı üze ğömere buyı xezmät itkän Başqortstan däwlät filarmoniäsendä zurlap xörmätlärgä buldılar.
Başqortstannıñ Çişmä rayonında tuıp üskän tatar yegete üzeneñ kiläçäk tormışın zur säxnä belän bäylärmen dip uylamıy da başta. Gärçä üze keçkenädän sänğät'kä bik nıq tartılsa da. Äxät mäktäptä uqığan yıllarında uq bik osta bii häm saratski garmunnarda özderep uynıy torğan bula. Yaqtaşları kiñäşe belän sälätle üsmer Ufadağı teatr uçilişçesına uqırğa kerä häm 1950 yıldan birle filarmoniädä eşli ul.
Äxät Urazmätovnı Başqortstandağı yumor häm satira sänğätenä nigez saluçılarnıñ berse disäñ dä bula. Ozın buylı artist Ğafur Latıypov belän bergä qısqa buylı Äxät Urazmätov ike qızıqlı obraz uylap taba – Bağanay häm Kätük obrazları. Menä şuşı rol'lärdä alar ozaq yıllar buyı böten ilne diärlek urap çığa. Tormıştağı ğibrätle häm kire küreneşlär xaqında qızıqlı säxnä küreneşläre belän tamaşaçılar küñelendä söyü ayulıy alar.
Bügen üzeneñ 75 yäşlek yubiley kiçäse aldınnan bez Äxät ağa Urazmätov belän oçraşıp anıñ icat yulı xaqındağı fikerlären beleştek. Yazmışımnan bik qänäğätmen di, yubilyar.
Äxät ağa üzeneñ 75 yıllıq yubileyın bilgeli. Başqortstan däwlät filarmoniäsendä comğa könne şuşı uñaydan zur kiçä ütä.
Fänis Fätxi, Ufa