Başqortstanda Ğälimcan İbrahimov könnäre bulıp ütte. Mäşhür yazuçınıñ tuuına 120 yıl tuluğa bağışlanğan çaralar uzğan atnanıñ pänceşämbesendä Ufada Miftaxetdin Aqmulla isemendäge Başqort däwlät pedağoğiä uniwersitetında fänni-ğämäli konferensiä belän açılğan ide. Artaban çaralar yazuçınıñ tuğan yağı — Awırğazı rayonı üzäge Tolbazı häm Soltanmorat awıllarında däwam itte. Ğälimcan İbrahimov könnäre 17nçe mart Stärletamaq pedağoğiä aqädemiäsendä fänni-ğämäli konferensiä belän tämamlandı. Çaralarda Qazannan kilgän ğälimnär häm yazuçılar da qatnaştı.
