Bügenge küzätüne Watanım tatarstan gäcitennän başlıybız. Bu yulı anda menä närsälär iğtibarğa layıq. Gäcitneñ 13 ğinwar sanında Asiä Yunısovanıñ Baylar cırı-2003 yazma basılğan ide. İsegezgä töşerep ütik, ul piramida üzägendä uzğan Tatar cırı bäygesenä bağışlanğan ide. Watanım Tatarstannıñ 20 fevral sanında isä älege yazma xaqında uquçılarnıñ fikerläre dönya kürgän. Alar bik küp, törle häm Asiä Yunısovanıñ yazması belän tulısınça rizamınnan alıp bu mäqäläne ber dä qabul itä almadım, digän diapazonında birelgän. Şulay uq bu sanda uquçılar Qazannıñ tarixı belän dä tanışa ala. Elekke häm bügenge Qazan rubrikasın daimi alıp baruçı yazuçı Rafail Mostafin bu yulı bügengäçä ser bulıp qalğan şähärneñ yäşeren cir astı yulları xaqında bäyän itä. Ä watannı saqlawçılar köne uñayınnan gäcitneñ comğa sanında Zäki Zäynullinnıñ Samolet tägärmäçe dip isemlängän xärbi xikäyäse urın alğan.
Mädäni comğa bu sanında üzeneñ Tatarnıñ zatlı şäxesläre rubrikasında uquçılarnı Riza Fäxretdin belän tanıştıra. Türklärneñ mäğnäwi rähbäre mäqäläsendä tanılğan ğalim, ruxani, jurnalist xaqında professor Xatip Miñnegulov yaza. Şulay uq gäcitneñ Tatarnı moñ yäşätä säxifäsendä kürenekle cırçı İlham Şakirovnıñ bayançı, xalqıbız köylären cıyuçı Roqıya İbrahimova belän äñgämäse basılğan. Bu söyläşü inde 1969 yılda bulsa da, ul äle dä bik möhim häm aktual kürenä. Xalıqara ana tele köne uñayınnan Mädäni comğa Qazan şähäre mäğärif idäräse başlığı urınbasarı Marat Lotfullin belän söyläşü oyıştırğan. Anda ul, Qazanda ata-analar balaların tatar telendä uqıtırğa telämäsä dä, millätneñ kiläçäge barıber awılda tügel, şähär mäğärifen, mädäniäten üsterergä kiräk, digän fikerne alğa sörä.
Şähri Qazannıñ comğa sanı şuşı arada tuğan köne bilgeläp ütüçe Rusiäneñ häm Tatarstannıñ xalıq artistkası Alsu Ğäynullinanıñ icatı xaqında yaza, anıñ belän äñgämä täqdim itä. Şulay uq gäcitneñ İlhamiät quşımtasında Ämir Mäxmütov üzeneñ yazuçı Sibğät Xäkim turında uylanuların täqdim itä. Tanılğan kompozitor Fänis Yarullinnıñ 90 yıllıq yubileyına bağışlap isä, Ence Yaqupova anıñ tormış yulı häm icatı xaqında yaza. Şunısın dä äytep ütik, yubiley uñayınnan 20 fevral könne Salix Säydäşev isemendäge Zur konsertlar zalında Fänis Yarullinnı iskä alu kiçäse uzdı.
Gölnaz İlgizär