Bu atnada İjaw şähäreneñ tatar gimnaziäse gör kilä. Berençe tapqır gimnaziädä teatr atnalığı uzdırıla. Gimnaziädä berençe könnän başlap «Çulpan» teatr studiäse eşli. Studiägä yörüçe balalar ike— tatar häm rus telendä spektakl'lär äzerlägännär ide inde. Ä menä gimnaziä külämendä barlıq sıynıflarnıñ spektakl'lär äzerläwe berençe tapqır. Bülmälärdä repetitsiälär bara, koridorda äledän äle säxnä kiemendäge balalar oçrıy. Gimnaziä totaş säxnägä äwerelgän disäñ däres bulır.
Teatr atnalığı turında gimnaziäneñ rus tele möğallimäse, respublikanıñ atqazanğan uqıtuçısı, «Çulpan» teatr studiäse citäkçese Güzäliä Mansur qızı Garif'yanova söyläde.
—audio—
Şulay itep, atnalıqta törle millät avtorları, xalıq äkiätläre belän tanışa alaçaq balalar.
Gimnaziä direktorı Gölzirä Fnün qızı Äxmätşina äytüençä, teatr atnalığı gimnazistlar arasında bik talantlı balalarnı barlarğa mömkinlek birde. Gimnaziäneñ teatr studiäsendä sänğät ölkäsendäge berençe belemnären alıp, mäktäp säxnäsendä berençe spektakl'lärdä qatnaşıp, kiläçäktä tormışın teatr belän bäyläwçe balalar da bulır, älbättä. Hiç yuğında, balalar teatr atnalığına äzerlänü çorında küpme avtorlar belän tanışa aldı.
Xämidä Ğayfullina, «Azatlıq» radiosı, Udmurtiä.