Çärşämbe könne Qazanğa Gor’kiy timer yulınıñ yaña citäkçese Viktor Sexin kilde. Tatarstan belän Gor’kiy timer yulı arasında bıltır imzalağan kileşüneñ ütäleşen tikşerergä kilgän Viktor Sexinnı Qazan kremlendä Mintimer Şäymiev qabul itte.
Respublikanıñ Tatneft’ şirkäte İran respublikasınıñ ber waqıfı belän berdäm oyışma tözäyäçäk. Bu xaqta jurnalistlarğa Tatarstannıñ Säwdä häm tışqı elemtälär ministrı Xafiz Salixov xäbär itte. Älege oyışma İranda neft’ tabu belän şöğellänäçäk.
Respublikanıñ xalıqara bazarda da menä şundıy aktiv eşläwe Tatarstannıñ tışqı säwdä äyläneşen arttıruğa kiterä. Bıyıl ul 2003 yıl belän çağıştırğanda 30 protsentqa, yäğni 362 million dollarğa artqan. 2004 yılnıñ 6 ayında tışqı säwdä äyläneşe 1 milliard 577 millionnan da artıp kitkän, dip xäbär itä Novosti Rusiä mäğlümät agentlığı. Respublika 89 çit il belän säwdä elemtäläre alıp bara. Alar arasında iñ zur külämdäge tawar äyläneşe Ukraina, Finländiä, Niderlandı, Pol’şa häm Qazaqstan belän.
Gölnaz İlgizär