Böten TİÜ neñ Plenum utırışı ikegä bülenüe turında bez sezgä düşämbe tapşıruında xäbär itkän idek inde. Räşit Yağfarov citäkçelegendäge BTİÜ idäräse äğzaları Qazan milli mädäni üzägennän çığıp kitep, üzäk binada Plenum utırışın uzdırdı, häm rezolyutsiä qabul itkännär ide. Qabul itkän rezolyutsiädä alar Rossiä xakimiäteneñ vertikal' tözeleşenä protest belderdelär. Ä Qazan milli mädäni üzägendä bülenep qalğannar kemnär alar , häm cıyılışıp söyläşep nindi qararğa kilgännär? Bu turıda BTİÜ neñ veteranı Mars Şämsetdinov belän söyläşäbez. “Barısı 24 keşe ide. Qazan bülege, Çallı, Çistay,Zelenodol, Aznaqay bülegennän idärä äğzaları bar ide . Räis itep Zäki Zäynullinnı sayladılar, ä mine polit sovet başına sayladılar. Räisneñ urınbasarı itep Räfis Kaşapov häm Yunıs Kamaletdinovnı sayladılar”,- dide ul.Dimäk, Bötentatar ictimaği üzäge aldında torğan töp mäs'älälär, töp burıçlar turında fikerlär ayırılmıy. Ämma Mars Şämsetdinov äytüenä qarağanda, BTİÜ idaräse häm aktivistları arasında qarşılıq betmägän. Ber yaqtan Räşit Yağfarov häm BTİÜ idärä äğzaları, ä ikençe yaqtan Qazan bülege häm alarğa iärgän berniçä rayon ictimaği üzäge wäkilläre. Soñğıları üzläreneñ citäkçese itep Zäki Zäynullinnı saylağannar. Räşit Yağfarov ütkärgän Plenumnıñ idärä utırışı turında xäbär birgäç, köndäşlek itüçe törkemnän dä sez tawış işettegez. Ä xäzer Qazan bülege wäkile Mars Şämsetdinov Rossiädä barğan säyäsi wäzğıät turında söyli. “13 sentäberdä Putin açıqtan açıq itep äytte, ul köçle eşlär belän genä şöğellänergä telägänen. Ekonomika yağınnan bernindi fiker dä äytmäde. Şunıñ öçen ul üzeneñ metodları belän genä eşlärgä isäbe bar. Bu Rossiäne tarqatırğa kiterergä mömkin . SSSRnıñ yulı buyınça barırğa isäbe bar.”- dide ul. Tatar milläte ni däräcädä bulırğa tieş?- digän sorawğa Mars Şämsetdinov bolay cawap birde: “Millät- xakimiät däräcäsendä bulırğa tieş,-dide ul. Ä prezidentnı saylap quymaw turında ul:“ Putinğa berär ”İvanovnı” , yäki berär tatar familiäle keşesen , ämma tatarnı satqan keşene anıñ üzenä täğäyenläp quyarğa mömkinçelek tua”,- dide. Bu äytelgän fiker Qazan bülege wäkile, İdel –Ural xalıqları Assambleyaseneñ general' särkätibe urınbasarı Mars Şämsetdinovnıñ fikerläre buldı.
Mälikä Basıyr .