Aq bars xokkey komandası könnän-kön köçle, tanılğan uyınçılar belän bayıtıla bara. Mäğlümät çaraları xäbärlärenä qarağanda, klub citäkçeläre şuşı könnärdä genä Nikolay Xäbibullin, Vensan Lekavalye, Bred Richards belän kileşkännär. Xäzer alar da Qazan komandası öçen uynayaçaq. Dimäk, bügenge köndä Aq Barsta NHLdan 7 iñ şäptän sanalğan uyınçı bar. Aldanraq qazanlılar komandanı Nikolay Antropov, Ruslan Saley, Daryus Kasparaytis belän köçleländergännär ide. Okean artınnan kilgän älege xokkeyçılarğa küpme aqça tülänäçäge räsmi räweştä äytelmäsä dä, Kommersant gäcite, mäsälän, alarnıñ härqaysına 1,5 million dollar tüläneläçäk, dip xäbär itä. Xäzer inde Aq Barsniñ Qazan yubileyına Rusiä çempionatında berençe urınnarnı yawlağanarın ğına kötäse qala.
10 noyäber könne tatarstanlılar yaña köçlär belän eşkä kereşte. Läkin respublikada bäyrämnär tämamlandı dip äytep bulmıy. Çärşämbe könne üzläreneñ hönäri bäyrämnären Eçke eşlär ministrlığı xezmätkärläre bilgeläp ütte. Şuşı uñaydan alarnıñ räsmi tantanaları da Piramida küñel açu üzägendä ütte. Anda iñ aldınğı xezmätkärlärne cıyıp qotladılar. Respublikada älege köndä 40 meñgä yaqın tärtip saqlawçı eşli. Yıldan-yılğa alarnıñ sanı da, militsionerlarğa eş tä arta ğına bara. Mäsälän, 2004 yılda cinayätlär sanı bıltır belän çağıştırğanda 10 protsentqa artqan. Anıñ qarawı qılınğan cinayätlär arasında üterü, narkotik matdälär belän bäylelärneñ sanı kimegän. Şunısı quandıra, cinayätçelärne tabu arta bara. Citmäsä, Tatarstan militsionerları İdel buyı okrugında iñ çibärläre dä ikän äle. Bäyräm aldınnan Tübän Novgorodta uzğan Eçke eşlär ministrlığı xezmätkärläre arasındağı çibärlek bäygesendä Qazannan Darina Ğilmetdinova ciñep çıqtı.
Şuşı aradağı küpsanlı bäyrämnär waqıtında da Qazannıñ meñyıllığına äzerlek xaqında onıtmıylar. Xäzer älege eşlär turında inde Mäskäwdä dä uylana başladılar. Rusiäneñ Finans ministrı Aleksey Kudrin Vladimir Putinğa Tatarstan başqalasınıñ yubileyına äzerlek xaqında söyläde. Qazanda isä bu atnanıñ comğasında bulaçaq zur cıyılışqa äzerlänälär. Anda Kudrin da kiler dip kötelä. Aleksey Kudrin süzlärenä qarağanda, bäyrämgä äzerlek digändä berençe çiratta şähärne tözekländerü, maturlatu küzallana. Şuña da, Qazanda 12 noyäberdä uzaçaq cıyılışta bäyräm çaraları tügel, ä meñyıllıqqa şähärne äzerläwdä närsä eşlängän häm tağı nilär eşlise barlığı, yäğni Qazanda metro, küper, yullar tözü xaqında süz baraçaq.
Ä menä Qazan däwlät universitetı üzeneñ 200 yıllıq yubileyın inde bäyräm itä. Şuşı uñaydan uza torğan çaralar xaqında 10 noyäber könne respublikanıñ Ministrlar kabinetında universitetnıñ rektorı Mäğzüm Säläxov jurnalistlarğa söyläde. Çärşämbe könne universitetnı tämamlawçılar oçraştı. Şulay uq bu könne älege uqu yortınıñ jurnalistika fakul’tetı bäyräm iite. Ä menä çärşämbegä bilgelängän jurnalistika fakul’tetınıñ yaña binasın açu tantanası kiçekterelde. Ul töp bäyräm çaraları belän 17 noyäberdä uzaçaq.
Gölnaz İlgizär