Phuket utrawınıñ xalıqara hawa alanı qaytırğa çirat kötüçe keşelär belän tulğan. Alar arasındağı ber alman turistı Reuters mäğlümat agentlığına, "yaqın waqıtta inde öygä qaytırmın dip ömetlänäm. Qaytqaç bäyräm itermen"... Tirä-yaq qayğığa batqan, ämma bolar äle – bäxetle keşelär. Tsunamida 14 italyan keşese hälak bulğan, yözlägän italyan turistınıñ qayda bulğanı bilgesez. Şvesiäneñ Tailandtağı ilçese Jonas Hafstrom, 3 meñ yarım şved watandaşı xäbärsez yuğaldı, dip belderde. "Raştua waqıtında monda ğadättä 15 meñnän alıp 20 meñgä qadär şved kilä. Sanap çıqqaç, xäzerge waqıtta – 3 meñ yarım keşeneñ qayda bulğanın belmibez", dide Şvesiä ilçese. Tailand eçke eşlär ministrlığınıñ soñğı mäğlümatlärenä qarağanda, ildä barlığı 4 meñ 560 keşe hälak bulğan, alarnıñ 2 meñ 230zı – çit il turistları. Ämma ministr süzlärenä qarağanda, tögäl sannar äle bulmayaçaq, çönki kön sayın yaña mäyetlär tabıla: "Bügennän başlap tağın ber atna ezläw eşlären däwam itäçäkbez, tağın 7 kön, annan soñ tağın qararbız" dide Tailand eçke eşlär ministrı.
Tai xalqına tsunami näticälären beterü, tirä-yaqnı çistartu eşenä mondağı çit il keşeläre dä yardäm kürsätä. Alarnıñ berse Ben Jablonski, "Yal itkändä ber könne irtän bez dä çistartırğa bulışırğa buldıq, monı kiçä eşlädek. Nindider eş barğan cirne küräbez dä – şunda barabız," di turist. Khao Lak utrawına kiterelgän distälägän mäyet berniçä könlek esselärdä inde tarala başlağan häm tanımaslıq xälgä kilgän. Alarnı waqıtlıça saqlaw urını, Yan Yao buddist ğibädätxanäsendä eşläwçe Yaña Zelandiä keşese Marko Cunningham – älege mäyetlär keşe sälämätlegenä zur qurqınıç tudıra dip belderde. "Tirä yaqta mäyet kisäkläre, kiçä monda etlär dä yörde, eye, bu qurqınıç urın" dide çistartu eşlärendä qatnaşuçı Yaña Zelandiä watandaşı.
Awstraliäneñ Tailandağı ilçese Bill Paterson, keşelärneñ ber bersen, tuğannarın tapqançı atnalar, bälki aylar üter, dip belderde: "Ber bersennän ayırılğan ğailälär, ber bersen taba almağan keşelär – cawapnı xäzer häm bügen işetergä teli. Ämma bik qızğanıç, bu atnalarğa yä dä aylarğa suzılırğa mömkin. Küp keşene inde xäzer tanıp bulmıy. Bez teşlären, DNA tikşerüläre uzdıraçaqbız" dide Awstraliäneñ Tailandağı ilçese. Tabiğat qazası bulğan töbäkkä tuğannarın ezlärgä bik küp keşe kilä dip xäbär itelde.
