AQŞta urnaşqan dönyanda demokratiä häm keşe xoquqları torışın küzätüçe Freedom House isemle oyışma Üzbäkstan räsmilären, törmädä säyer şartlarda hälak bulğan Samandar Umarovnıñ eşen tikşerep xisap birergä çaqırdı. Oyışma citäkçese Jennifer Windsor kiçä yasağan belderüdä, "Üzbäk cämğiäte döreslekne belergä tieş" dide. Atna başında Üzbäkstandağı bäysez keşe xoquqları oyışmaları da 17 yılğa törmägä utırtılğan Umarovnıñ cäberlänep üterelüe ixtimalına iğtibar itergä çaqırğan ide. Umarovnı tıyılğan islamçılar törkemenä qatnaşı buluda ğayepläp xökem itkännär ide. Totqınnıñ tuğannarı, anıñ başında cäberläw işaräläre bar ide, dip söylägän.
Üzbäkstan general prokurorınıñ matbuğat wäkile Svetlana Artikova, Umarovnıñ yöräk öyänägennän wafat bulğanın, häm anıñ eşeneñ qabat tikşerelügä tapşırılğanın xäbär itte.
