Bu yılnıñ mart ayında Başqortstan belän Çeçnä respublikası arasında Duslıq häm üzara xezmättäşlek turında kileşü tözelergä mömkin. Bu xaqta «Azatlıq» radiosı xäbärçesenä çeçennarnıñ Başqortstandağı «Bart» milli-ictimaği oyışması räise Lom Ali İsrailov xäbär itte. Lom Ali äfände süzlärençä, bu yılnıñ mart azağında Ufağa Çeçnä Respublikasınıñ Däwlät Sowetı wäkillege kiläçäk. Menä şul säfär barışında ike respublika arasında üzara xezmättäşlekneñ küp yünäleşlären tikşerü häm täwge zur kileşüne imzalaw da küzdä totıla. Bu säfär barışında Çeçnä respublikası wäkillege Başqortstan citäkçelege belän häm Başqortstan Däwlät Cıyılışı wäkilläre belän oçraşıp söyläşülär ütkärergä cıyına.
Çeçennarnıñ Ufadağı «Bart» oyışması citäkçese Lom Ali İsrailov äytüençä, bu säfärne oyıştıru täñgälendä Başqortstanda yäşäwçe çeçennar da üz yağınnan äzerlek eşlären başlıy. «Qayber ğumanıytar mäsälälärne xäl itä dä başladıq inde, – di Lom Ali äfände. – Misal öçen, bez Çeçnyä respublikası mäktäplärenä cibärü öçen, däresleklär häm ädäbi kitaplar tuplıybız. Şundıy uq aksiä bıltır uqu yılı başlanğanda, sentäbr ayında ber tapqır oyıştırılğan ide inde. Monısında da berniçä distä meñ kitap tuplaw mömkinlege bar».
Başqortstan belän Çeçnyä arasında Duslıq häm üzara xezmättäşlek turında kileşü tözü ike yaq öçen dä faydalı buluına Başqortstanda yäşäwçe meñ yarım çaması çeçen xalqı wäkile dä şiklänmi, di Lom Ali İsrailov.
