21 noyäberdä bötendönya televidenie köne bilgeläp ütelä. Tatarstanda televidenie tarixı, 60nçı yıllardan başlanıp kitä. Ul waqıtta Qazan studiäse barlıqqa kilä, tapşırular äzerlänä başlıy. 40 yıl buyına Tatarstan televideniese zur üseş yulın ütä. Tapşırular sanı arttı, ämma efir waqıtı, az bulıp qaldı, könenä, ber niçä säğät kenä ide. 90nçı yıllarda, «Azatlıq!» şigärläre belän bergä, mäydannarda, täwlek buyı häm gel tatarça ğına söyläwçe radio, televidenie buldıru taläpläre quyılğan ide. 2001 yılda «Tatarstan -Yaña ğasır» televideniese barlıqqa kilgäç, milli xäräkät wäkilläre dä, zıyalılar da Tatarstannıñ üz kanalı bar xäzer, dip aña zur ömetlär bağlağan ide. Şuña kürä, televidenieneñ üseşe, tapşıruları turında söyläşü başlanğaç, alar böten xalıq, Qazan häm annan çittäge tatarlar qatnaşlığındağı cämäğätçelekneñ fiker alışuına äylänä. Böten dönya televidenie könendä, «Yaña ğasır» radiosı efirında qatnaşqan tele-radio kompaniä general direktor urınbasarı Miläwşä Aytuğanova belän söyläşü, tıñlawçılarnıñ iğtibarın cälep itte. Miläwşä Aytuğanova, tamaşaçılar tarafınnan yaratıp qarala torğan tapşırularnı atadı, äzerlänep kilä torğan yaña programmalar turında söyläde. Turı efirdağı tapşıruğa şaltıratqan tıñlawçılar, tatarça tapşırular kübräk bulsın ide, digän teläk belderde. «Yaña ğasır» radiosınıñ häm televidenieseneñ daimi tamaşaçısı ber xanım, tapşırularığız äybät, ämma törle säbäplär arqasında qaramıylar, digän fikere belderde. «Yaña ğasır» kanalınıñ direktor urınbasarı Miläwşä Aytuğanova, bu tıñlawçığa, kanalnı qaraw öçen, texnik yağın qayğırtırğa kiräk, antennalar, kabel’lär problemasın tikşerergä kiräk, dip cawap birde. Tıñlawçılar häm televizor qarawçılardan kilgän tağın ber replika, şulay uq, kanalnıñ tapşırularına qağılışlı ide. Tatarstan rayonındağı ber televizor qarawçı, Tatarstannıñ üz kanalın tatarça ğına itü bulmaslıq xıyalmı, digän soraw birde. Miläwşä Aytuğanova, «äye, bu minem xıyalım», dide. Ämma anıñ öçen bik küp cihaz häm aqça kiräk, dide ul. Anıñ süzlärençä, ägär kiläçäktä andıy qarar qabul itelsä, Prezident xäl itsä, berse tatarça, berse urısça ğına eşläwçe 2 kanal bulır. Älegä Tatarstannıñ räsmi televizion kanalında tapşırular ike teldä, tatarça häm urısça bara. Radioda da şulay uq. Annan arı, tatarça televizion tapşırularnı elekke «Tatarstan» kanalında, ber niçä säğät qararğa bula. Şulay uq, TNT kanalında, Efir kanalında «Qazan» studiäsendä äzerlänä torğan atnağa ber tapqır tatarça tapşıru çığa. Şulay uq, başqa şähär häm rayonnardağı telestudiälär, Çallı häm Tübän Kamada, Bögelmädä, Çistayda, Saba häm başqa töbäklärdä, finans mömkinleklärdän çığıp qayadır kön sayın, qayadır atnağa ber, milli programmalar äzerli.
Bikä Timerova