Ukraina qorallı köçläreneñ baş idarä citäkçese häm qorallı köçlär başlığı Serhiy Kırıçenko AQŞ belgeçlärenä Aqyar häm Mukaçyovodağı radar stansiälärenä kilergä röxsät birü turında qarar älegä yuq dip belderde.
Saqlanu ministrlığı süzçese Andriy Lısenko uzğan atnada Ukraina prezidentı Viktor Yuşçenko belän AQŞ däwlät sekretare Condoleezza Rice arasında ul turıda süz bötenläy kütärelmäde dide.
Uzğan atnada matbuğatta Yuşçenko Riceqa raketa häm ğäläm proyektlarında xezmättäşlekne arttıru turında täqdim bularaq bu radar stansiälärenä AQŞ belgeçlären kertü mömkinlege turında äytkän digän xäbärlär bulğan ide.
Qırımnıñ Aqyar şähärendä häm Karpat tawlarındağı Mukaçyovoda urnaşqan aldan kisätüçe radar sistemaları Üzäk häm Könyaq Yewropa kügen küzätep tora. 1992-nçe yılğı kileşü nigezendä alar mäğlümätlärne Rusiä strategik köçläreneñ raketa höcümnäre turında kisätü sistemasına tapşırıp tora. Matbuğattağı xäbärlär Rusiäneñ Ukraina öçen gaz bäyälären kütärüe turında iğlan itelgännän soñ çıqtı.
