GAUGA татар рок-төркеме бишенче альбомын чыгара, ул ALISA дип аталачак. Бу хакта "Бизнес Online"га төркемнең җырчысы Оскар Юнысов сөйләгән. Ул бу җыентыкта үзләренең "караңгы якларыннан" ачылачакларын әйткән.
— Әле берничә ел элек кенә ике җыентык ниятләгән идек. Берсен үзебез өчен иң сексуаль татар альбомы дип билгеләдек, икенчесен – иң депрессив дип. Юбилей альбомы чыгарып, аны ниндидер үзенчәлекле итү фикере юк иде. Бу – безнең хәзерге вакытттагы тойгыларыбызның чагылышы. Язын тыңлаучыларны язгы җырлар белән шатландырырга тырышырбыз, ә әлегә бераз караңгы һәм салкын булсын, — дигән ул.
Артист әйтүенчә, җыентыкның һәм шул ук исемдәге җырның исеме – Льюис Кэрроллның Алиса турындагы әсәрләренә барып тоташа. "Кеше бөтен өметен югалтканда иң соңгы булып ышана торган әйберсе – могҗиза. Җырда Алисага бу дөньядан Көзге артына алып китүне сорап мөрәҗәгать итү бар", дигән ул.
ALISA — GAUGA рок-төркеменең бишенче җыентыгы, анда соңгы алты елда язылган 10 җыр кергән. Релизны Казанда 8 ноябрьдә тәкъдим итәчәкләр, аннан соң төркем Уфага китәчәк.
- GAUGA татар инди-рок төркеме "Kamfit" исемле моңа кадәрге җыентыгын май аенда чыгарган иде. "Альбомда Kamfit дигән җыр бар, пластинканың исеме дә шуннан килә. Ә бу сүз балачактан хәтердә калган, әби кәнфит сүзен матур татарча итеп, "камфит" дия иде", дигән иде төркем җырчысы Оскар Юнысов. Kamfit җыентыгында 9 җыр бар. Аны Уфада яздырганнар.
- 2019 елда Gauga төркеме Казанның "Соль" барында беренче концертын куйды. Концерт алдыннан Азатлык Оскар Юнысов белән сөйләшкән иде.
- Апрель ахырында Казандагы qaynar музыкаль лабораториясе дә яңа альбом чыгарды. Биш җырдан торган бу җыентык ATNCHKLR (Атынчыклар) дип атала һәм "2022 елдагы проблемнар һәм XX гасыр башы каһарманнары" турында сөйли. Альбомга биш җыр кергән: "Мин/Без – Муса Җәлил", "Казан – Чаллы", "Холтер", "Күлмәк", "Сәхибҗамал, Газиз һәм Фатыйх".
- Шулай ук күптән түгел ОММАЖ синти-поп төркеме татар телендә ретрохоррор жанрында клип чыгарды. Ул "Тоелган" җырына төшерелгән.
🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!