Radiobıznıñ ärmän redaksiäse xäbär itüençä, Yerevan tulı polisiä buluğa qaramastan, oppozisiä wäkilläre töştän soñ yañadan cıyılğan. 10 kön elek uzğan prezident saylawı näticälärenä protest belderep alar "azatlıq" häm "Levon" dip qıçqırğan. Keşe xoquqları wäkile Armen Harutiunian wazğiätne kierenke dip bäyäläde:
"Bik kierenke häm awır wazğiät tudı. Tınıç uram cıyının polisiäneñ köç qullanıp taratu xoquqı yuq ide," - dide Harutiunian.
Elekke prezident Levon Ter-Petrosian mäydanda bulğan xällär turında menä nilär söyläde:
"Keşelär tınıç qına yoqlıy ide. Maxsus köçlär kilep tayaqlar belän alarnı qıynıy başladı. Min mikrofon yanına kilep xalıqnı tınıç bulırğa çaqırdım. İminlek köçläre kilgäç tä qıynıy başlamadı, alar keşelärne uratıp aldı. Min xalıqnı polisiä belän bäreleşmäskä çaqırdım, başta alarnıñ nişliäçägen kürik, didem. Ämma söyläşülär bulmadı, bezgä ber kem ber ni äytmäde, annarı polisiä xalıqnı qıynıy başladı," - dide Ter-Petrosian.
Polisiä üz xezmätkärläreneñ yaralanğan buluın häm oppozisiä çatırlarında qoral tabılğanın xäbär itte. Çatırlarnı cimerer öçen mäydanğa xärbi maşinalar kiterelgäç polisiä böten jurnalistlarnı quğan, dip xäbär itelä.
Yevropada İminlek häm Xezmättäşlek Oyışması räise, Finlandiä tışqı eşlär ministrı İlkka Kanerva, uram cıyınına qarşı köç qullanunı täñqitläp çıqtı häm qulğa alınğannarnı irekkä çığarırğa, oppozisiä belän xökümätne söyläşülärgä çaqırdı.
Ärmänstanda 19 fivral bulğan prezident saylawında premyer-ministrı Serj Sarkisian tawışlarnıñ 53% alıp prezident dip iğlan itelde. Ter-Petrosian öçen 21.5% tawış birde. Oppozisiä Sarkisian xärämläşülär yulı belän ciñgän dip däğwa itä. Ciñüçe üze monı kire qağa.
Räsmilär uram cıyının oyıştıruçılarnı qanunsız yullar belän xakimiätne üz qullarına alu tırışlığında ğäyepli. Bügen irtän bulğan xällärgä qadär Yevropa Şurası häm Yevropada İminlek wä Xezmättäşlek Oyışması taraflarnı tınıçlıqqa çaqırğan ide. Oyışmadağı AQŞ wäkile, Waşington Ärmänstanda saylawdan soñğı xällärgä bik borçıla, dip belderde.