Törek Qorallı Köçläre (TQK) Tönyaq Ğiraqqa ütep kerep Körd partizan oyışması PKK-ğa qarşı başlatqan xärbi köräşen sigez köndä tämamlap kire qaytqan ide. TQK xärbi otraydalarınıñ kire cigenüe ütkän atnada, AQŞ saqlanu ministere Gatesneŋ Ankarağa yasağan vizitı waqtında “Ğiraqtan çigenegez” häm şuluq könne Prezident Bushnıñ “Törek armiäse çigenergä tieş” dip yasağan belderülärennän tulı ber kön dä uzmastan ğämälgä aşırıldı. Xätta bu kire çigenüdän xökümät räise Premier Erdoğannıñ da xäbäre bulmawı añlaşıldı. Xökümät räise Erdoğan Gatesneñ taläplärenä “waqıtı kilgäç kire çigenerbez”, general ştab başlığı armiä generalı Yaşar Büyükanıt isä “bu cigenü ber könnän soñ da, ber yıldan soñ da bulır, Amerikannar Afganistanda niçä waqıttan birle toralar” dip cawap qaytarğan ide. Äle bu süzlär qolaqlarda yañğırağanda Tönyaq Ğiraqtagı Körd çitäkçelärdän Zerdabineñ “Törek armiäse kire çigenä başladı” dip dönyağa beldereüe häm Törek cämağätçelegeneñ, xätta säyäsilärneñ bu xäbärne, TQK çığnaqlarınnan tügel dä, berençe bularaq añardan aluwı bik säyer toyıldı. Qayberäwlär AQŞ quştı häm bez monı ütädek, bu täräqqiät turında Tönyaq Ğiyraqtağı Kördlär dä belä ikän digän tänqit süzläre kütärelä başladı. Monnan soñ isä generalştab başlığı Büyükanıt, “bez monı aldan uq planlağan idek” digän belderü yasap, AQŞ-nıñ bu qararda ber nindi dä täsire bulmawın cämağätçelekkä añlatırga tırıştı. Xätta ul “AQŞ-nıñ role buluwın isbatlasınnar, uniformamnı salıp taşlarmın” dip beraz emotsional çığış yasadı. Generalneñ üzenä qarata yasalğan tänqitlär säbäple Millätçe Xäräkät Partiäse citäkçese Däwlät Bahçäli belän Cömhuriät Xalıq Partiäse liderı Däniz Baykalnnı da tänqitläwe här ike lidernıñ añarğa cäwap birüwenä yul açtı. Asılda yaqın çor Törek tarixında säyäsilär armiä belän polemikağa kermäskä tırışıp kildelär. Gomumän xalıq ta armiägä süz äyetermäskä tırışıp kilä. Läkin bu yulı AQŞ-nıñ basımı uramdağı keşedän dä yäşrenä almağanlıqtan oppozitsiä reaksiä kürsätergä mäjbur buldı. Premier Erdoğan isä üz näwbätendä “qararlardan bez cawaplıbız” dip xärbilärne höcümnän saqlarğa tırıştı. Läkin generalştab monıñ belän genä çiklänmäde häm 4-nçe Martta üz internet säxifäsendä bik qatı eçtälekle ber belderü iğlan itte. Şuşı belderüdä diqqätne iñ küp cälep itkän
“Bu höcümnär, TQK-neñ terror belän köräşenä, xainnardan küberäk zian birä” digän cömlä ide.
CXP lidäre Baykal şunduq moña elektron poçta aşa internetta tübändäge cawapnı birde:
“Bez demokratik ber diskussiä alıp barabız. Bezgä cawap birergä tiyeş keşe Premier. Ber kemdä arabızğa kerergä tıqşınmasın Başqalarnı xurlap, xäkärät itep xaqlı buluwığıznı isbatlıy almıysız”.
Bu cawap ta generalştabnıqı kebek qatı eçtälektä ide. MXP isä üz näwbätendä, şulay uq internet aşa, tübändäge belderüwne yasadı:
“Wazıyfası häm pozitsiäse ni bulsa bulsın ber kem dä MXP-en xainnardan küberäk ilenä zian birgän ber oyışma bularaq kürsätü xaqın üzendä kürä almayaçaqtır.”
Bu internet aşa belderülär kiñ küläm mäğlümät äsbablarınıñ da töp temasına äwerelde. Çönki generalştabnıŋ monnan elek tä xakimiättägelärne kisätkän belderüläre bulğalap torsa da, berençe märtäbä här daim armiä safında torğan ike zur oppozitsion partiägä höcüm itkän buldı. Dimäk oppozitsiäneñ tänqitlärendä xaqlılıq payı bar. Yuğisä generalştab başlığı şundıy köçle reaksiä kürsätmägän bulır ide. Bu krizis ni xätlegä suzılır, äytüwe qıyın.