Mäclestä barlığı 290 urın, kiçkä qadär qaysı köçlärneñ niçä urın alaçağı bilgele tügel ide.
İranda 44 million keşe saylawda qatnaşu xoquqına iä. Üz wäkillären alar 4500 namzättän saylarğa tieş ide. İran eçke eşlär ministrlığınıñ matbuğat wäkile bu yulı tawış birüdä xalıqnıñ 65% qatnaştı, dip belderde. 2004 parlament saylawında bu san 51% ide.
Yuğarı ruxi citäkçe Ayatolla Ali Khamenei häm başqa yuğarı räsmilär xalıqnı saylawda äwzem qatnaşırğa, İrannıñ doşmannarına bireşmäskä çaqırğan ide. Reformaçıl köçlär üz saylawçıların kiläse parlamentta qadimi köçlär täsiren kimetergä çaqırdı.
"Min bik şat, min xalıqnıñ monda kilep tawış birä alğanına häm üz namzätlären saylıy alğanın böten dönyağa kürsätep il belän idarä itügä üz öleşen kertä alğanına min bik bäxetle,"- dide Tährandağı Xösäiniä Erşad mäşetendä tawış birep çıqqaç ber xanım.
Ämma här saylawçınıñ da mondıy qanäğät bulmağanı küzätelde:
"İsemlektä miña oşağan ber namzät tä bulmadı, üzemä turı kilgän namzätne taba almadım," - dide başqa ber saylawçı.
Associated Press mäğlümat agentlığı xäbär itüençä, räsmi sannar xalıqnıñ tawış birüdä äwzem qatnaşuın kürsätsä dä çınbarlıqta saylawğa kilüçelärneñ küpçelege – prezident Äxmädinicad yaqlı namzätlärne saylawçılar.
"1979 yılğı İslam İnqilabınnan soñ bulğan bu sigezençe parlament saylawında qızğanıçqa qarşı bik küp reformaçıl, millätçe häm xäzer xakimiättä bulğannardan yıraq torğan başqa namzätlär töşep qaldı. Näticädä bik küp saylaw üzägendä il belän idarä itkän köçlärdän qala başqa namzätlär isemlektä dä yuq. Bu xalıqnı borçuğa sala, şuña kürä bik küp bülgälärdä xalıq tawış birügä bötenläy barmadı," - di elekke reformaçıl deputat Cäläl Cälilzadä.
Saqçılar Şurası 1700läp reformaçıl namzätne İslam İnqilabına tieşle däräcädä tuğrılıqlı tügel, dip saylawğa terkämäde. Xäzer alarnıñ Mäclestä küpçelekne alu ömete yuq, reformaçılar hiç yuğı bulğan 40 urınnı saqlap qalu öçen köräşä.
Qayber säyäsätçelär barıber yaña parlamentta prezident Mäxmüd Äxmädinicadqa qarşılıq zurraq bula ala, dip farazlıy.
"Reformaçıl namzätlär Mäclesneñ öçtän ber öleşen alırğa mömkin. Bu köçle azçılıq, Äxmädinicad säyäsätenä qarşı bulğan konservativlar belän berläşsä – köçle küpçelekkä äylänep anıñ qanunçığaru eşendä yoğıntı yasıy ala. İkençe yaqtan, alar Äxmädinicadnıñ eçke häm tışqı säyäsätenä, bigräk tä iqtisad ölkäsenä täsir itä ala," - Tähranda yäşäwçe tanılğan jurnalist Maşalla Şämsülwäezin.
Waşingtonda Däwlät Departamentınıñ matbuğat wäkile Sean McCormack İran saylawın täñqitläp çıqtı, näticälär "aldan bilgele ide", İran xalqınıñ saylaw mömkinlege yuq ide, dide.
Bu tawış birü prezident saylawına ber yıl qalıp barğanda Äxmädinicad köçlärenä sınaw da buldı
Reformaçıl namzätlärneñ kübese parlament saylawına terkälä almadı. Küzätüçelär mondıy saylawnıñ irekle bula almağanın belderä.