AQŞ Rusiäneñ Gruziä eşlärenä tıqşınuına borçıla

Mäğlüm bulğança, Rusiä Gruziädän ayırılıp çığarğa teläwçe Abxaziä häm Könyaq Osetiä belän xezmättäşlekne arttıru niäte turında beldergän ide.

Comğa könne Condoleezza Rice Waşingtonda Estoniä prezidentı Hendrik İlvesnı qabul itte. Soñınnan jurnalistlar aldına çığıp ul Waşington Gruziäneñ territorial bötenlegen yaqlıy, dip belderde:

"Bez Rusiä prezidentınıñ yaña färmanına borçılu belderäbez. Bügen irtän min tışqı eşlär ministrı Lavrov belän söyläştem. Kiçä Gruziä prezidentı Mixail Saakaşvili belän söyläştem. Quşma Ştatlar Gruziäneñ bülenmäs däwlät bulıp qaluın yaqlıy. Bez Gruziä belän Abxaziä häm Könyaq Osetiä arasında nindi dä bulsa çaralar kürep bulaçağına ışanabız," - dide Rice.

Kiçä däwlät departamentınıñ matbuğat wäkile Sean McCormack, "Waşington Rusiäneñ 16 april färmanın ğamäldän çığarırğa çaqıra", dip belderde.

16 aprildä prezident Putin xökümätkä Abxaziä häm Könyaq Osetiä iğlan itkän qayber dokumentlarnı tanırğa häm bu respublikalar belän xezmättäşlekne arttırırğa quştı.

AQŞ, NATO häm Yevropa Berlege Rusiäne bu adımnan tıyılırğa çaqırdı. Comğa könne Rusiä tışqı eşlär ministrlığınıñ matbuğat wäkile Mixail Kamınin, Gruziä belän aralarnı caylaw häm iqtisadi çikläwlärne beterü turında iğlan itte.

"İke il arasında transport yöreşen kire qaytaruğa östäp tizdän poçta elemtäse qaytarılaçaq. Başqarma xakimiätkä Gruziä watandaşlarına qarata viza çikläwlären beterü Yuğarı Lardağı çik buyı noqtası tözeleşen tizlätü häm Gruziä tawarların Rusiä bazarına kertü öçen belgeçlär belän söyläşülär başlaw quşılğan," - dide Kamınin.

Däwlät departamentı süzçese McCormack, Rusiäneñ Abxaziägä qarata iqtisadi häm xärbi çikläwlärne ber yaqlı ğamäldän çığarğanın iskä töşerde. Rusiäneñ bu adımın Gruziä vise-premyerı Giorgi Baramidze täñqitläp çıqtı.

"Bu adım qurqınıç adım ğına tügel, bu provokasiä. Bu – bezneñ ildä genä tügel, böten töbäktä wazğiätne qaqşataçaq. Gruziä ber kem belän dä xärbi nizaqqa kerergä telämi, bigräk tä üz cirendä. Gruziägä tınıçlıq kiräk. Şuña kürä xärbi plannar turında süz dä bula almıy. Bez diplomatik, qanuni häm säyäsi adımnar turında ğına söyläşäbez," - dide Baramidze.

Baramidze bolar xaqında comğa könne Brüsseldä belderde. Şulay uq Gruziä vise-premyerı Rusiäneñ ike separatist respublika belän tığızraq elemtä urnaştıru niäte – Kosovonıñ bäysezlek iğlan itüe häm NATO kiñäyüenä bäyle bulırğa mömkin, dip farazladı.

Tiflis soñğı bu xällärgä qarata BMO İminlek Şurasınıñ çirattan tış utırışın cıyarğa çaqırdı. Şura prezidentı Dumisani Kumalo süzlärenä qarağanda, utırış kiläse atnada bulırğa mömkin.