Bu könne Amerika Tatarları Assosiasiäseneñ idaräsendä tabınnı barı tik irlär genä äzerli ikän. Assosiasiädä 300läp äğza isäplänä. Oçraşuğa isä alarnıñ 100gä yaqını kilde. Çäy-kähwä häm milli rizıqlar belän sıylanğannan soñ cıyılğannarğa tamaşa-konsert kürsätelde. Biredä çığışı belän Üzbäkstannan bulğan tatarlar häm başqortlar bar. Kiçädä tatarça häm başqortça cırlar başqarıldı, şiğerlär uqıldı. Läkin küpçelek biredä Qıtaydan, Törkiädän kilgän tatarlar.
Assosiasiä äğzaları bulğan Rawil häm Asiä Agilar Qıtayda tuıp anda rus mäktäbendä uqığan, annarı Törkiä häm soñınnan AQŞqa küçep kilgän. Alar 4 bala üstergän. Asia xanım bik matur cırlıy häm fortopianoda uynıy. Röstäm Yaxin aña üz romanslar cıyıntığın büläk itep alarnı inglizçä cırlawnı sorağan bulğan. Asia Agi Röstäm Yaxinneñ "Kiek qazların" ingliz telenä tärcemä itep anı üze başqaruında ber cıyıntıqqa kertkän.
Balalar da tatarça söyläşä, cırlıy. İdarä diwarlarına elengän Söyembikä, Tuqay räsemnäreneñ barısın da balalar yasağan. Monıñ öçen maxsus däreslär yäki mäktäp yuq, olılar üzläre balalarnı cıyıp belgän hönärlären öyrätälär.