87 yıllıq Törkiä comhuriäte tarixında säyäsi partiälärneñ yabıluı asılda şaqqatarlıq xäl tügel. 1960,1971 häm 1980-nçe yıllarda öç märtäbä xärbi putç ütkärelep ber möddät barlıq säyäsi partiälär yabılğan çorlar da bulğaladı. Monnan tış dini yaki separatist tendentsiädäge partiälärneñ dä yabıluı vaqiğäläre dä bulğaladı. Bugenge köndä isä xakimiättä häm ütkän yıldağı saylawlarda tawış birüçelärneñ 47 protsentınıñ yaqlawına ireşkän Gädellek häm Täräqqiät Partiäse, yaki qısqaça äytkändä AK partiäne konstitutsiäneñ laisızm, yäğni dinne däwlät eşlärennän ayıru prinsipın bozuda ğäyepläp xökem protsesı başlandı. Bu xäl AK partiä saflarında bulğanı xätle AB-ndä dä tiskäre reaksiä tudırdı.
Inde niçä waqıttan birle tik säyäsätçelär arasında tügel, ä ğadi watandaşlar da “AK partiä yabılaçaqmı, yuqmı” digän diskussiälär bara. Här ike keşedän bereneñ töp teması bu diärgä mömkin. Bu atnada Şvetsariä bankası Credit Suisse öçen “A häm G” isemle Xalıq fikren öyrän oyışması 24-25 May tarixlarında 33 şähär häm 109 rayonda 1.173 xatın qız, tulayım 2.386 saylawçınıñ fikeren öyrände. Şuña kürä tawış birü yäşendägelärneñ 30 protsentı bugen saylawlar bulsa nindi partiägä tawış biräçägen älegä belmi. Qalğannarınıñ 28 protsentı AK, 14 % Comhuriät Xalıq häm 12 % Millätçe Xäräkät partiälärenä tawış biräçäklären beldergän.
Älegä qarar birmägännärne dä şuşı xisapqa kertkändä AK partiä çağıştırmaça 40, CXP 19,5 häm MXP 17 % tawış alaçaqlar. Dürtençe urında isä kördlärneñ Demokratik Cämğiät Partiäse tora. Aña saylawçılarnıñ 6,5 tawış biräçägän bäyan itkän. Dimäk AK partiä ütkän yılnıñ 22-nçe iyülendä 47 protsent tawış alğan bulsa, bugen 40 % qına tawış alaçaq. Başqaça äytkändä AK partiä saylawçısınıñ 7 %-ı inde partiä belän riza tügel digän süz. Cide protsent az kebek kürensädä, 25-30 million saylawçıda bu zur san. 2 millionnan artıq keşe digän süz. Döres şulay da AK partiä iñ zur partiä buluwın däwam itä, ämma anketaga kürä xätta üz saylawçılarınıñ da yaqlawın yuğalta başlağan.
“A häm G” xalıq fikren öyränü şirkäte oyıştırğan anketağa kürä tulayım alganda saylawçılarnıñ 47%-ı xökümätne alıp bargan eşlärendä uñışsız dip bäyäli. AK partiäne saylamawçılarda bu 71,5 %-qa üsä. Dimäk, xalıqnıñ 50 protsenttan artığı xökümätneñ eşçänlege belän riza tügel.
Anketada “kiläse ber yılda Törkiä yaxşıraqmı, yamanraqmı bulaçaq, yugisä şulay uq qalaçaqmı?” digän sorawga 52,5% yamanraq bulaçaq digän fiker äytkän.
Bu anketa Törkiädäge säyäsi bilgesezlekneñ saylawçılarga da tiskäre yoğıntısın surätli. Ekonomik stabillek xätle säyäsi stabillık tä möhim. Ämma bere bulmıyça ikençese bulmıy. 4-nçe iyündä iğlan itelgän inflatsiä sannarı da eşneñ yaxşıga barmawın kürsätüçe başqa ber dälil buldı. Altı yıldan soñ berençe märtäbä bularaq waqlap satıp aluda inflatsiä 10 protsentnı aştı.
Qısqası Törkiädä säyäsi bilgesezlek köçäyä bara. Xalıq ta aptıragan xäldä. Kiläçäk belän bäyle farazlar här kön mätbugat bitlärendä çağılış taba.