Кырым низагы. Вакыйгалар дисбесе

РУСИЯ КЫРЫМГА ИҢ ЭЛЕК СИЛОВИКЛАРНЫ КИТЕРӘ--

Кырым ярымутравында Русия дәүләт структуралары эшли башлый. Иң элек анда Русия тикшерү комитеты эшли башлады. Бу хакта идарәнең рәсми вәкиле Владимир Маркин белдерде.

ДИСНЕЙ ПУТИННЫҢ КЫРЫМ ПЛАНЫН АЛДАН БЕЛГӘНМЕ?--

Бу көннәрдә кинотеатрларда яңа мультфильм чыга - "Маппетлар-2". Аның сюжеты үзенчәлекле рәвештә хәзерге Кырым кризисы белән аваздаш. Төп рольдә - Константин исемле бака, "җинаятьче #1". Ул рус акценты белән сөйләшә. Аның планы Европада зур җинаять оештыру, урлау. Чагыштырып карасаң, башка геройларның да чын тормыштагы тиңдәшләрен табарга була.

АТР ХУҖАСЫНА БАСЫМ БАШЛАНА?--

Журналист Айдер Муждабаев АТР каналы хуҗасы Ленур Ислямовка карата медиа-һөҗүмнәр башланды, ди. Ридус порталы аны радикаллар белән бәйле дип яза. Ислямов үзе Русиядә эшмәкәрлек белән шөгыльләнә.

УКРАИНА САКЛАНУ МИНИСТРЫН ЭШТӘН АЛДЫ--

Югары Рада саклану министры Игорь Тенюхны эштән алды. Аның вазифасын вакытлыча башкаручы итеп генерал-полковник Михаил Коваль билгеләнде.

"АЗАТЛЫК"НЫҢ КЫРЫМ САЙТЫ ЭШЛИ БАШЛАДЫ--

Азатлык радиосының Кырымга багышланган сәхифәсе эшли башлады. Ул кырымтатар, украин һәм рус телләрендә хезмәт күрсәтә.

КЫРЫМ ГАЗАПЛАУЛАРЫ: КИСЕЛГӘН КОЛАК, ЭЛЕКТР ТОГЫ, РУСИЯ ГИМНЫ [ФОТО, ВИДЕО]--

Кырымда Русия яклы активистлар һәм хәрбиләр украин активистларын тоткынга алганнар иде. Аларны вәхшиләрчә газаплаганнар: ток тоттырганнар, колагын кискәннәр, аякларына атканнар һ.б.

КЫРЫМТАТАРЛАРЫ ҮЗ РЕФЕРЕНДУМЫН УЗДЫРЫРГА НИЯТЛИ--

Аның нәтиҗәсенә карап киләчәктә нинди юнәлештә эш итәчәкләрен билгеләячәкләр. Бу хакта бүген кырымтатар лидеры Мостафа Җәмилев белдерде.

Аның сүзләренчә, 29 мартта кырымтатар корылтае узачак. Анда кырымтатар халкының үзбилгеләнү мәсьәләсе күтәреләчәк.

Референдум мәсьәләсе әле төгәл билгеләнмәгән, ләкин ул Украина канунына каршы килмәячәк, ди Җәмилев.

АКМӘЧЕТТӘ ХАЛЫК РУСИЯ ПАСПОРТЫ АЛЫРГА ЧИРАТТА ТОРА--

Акмәчеттә (Симферополь) Русия паспортлары бирәләр. Кешеләр аның өчен чиратка тезелгән.