Малайзия очкычын бәреп төшерүдән соң халыкара тикшерү мөмкинлеген булдыру өчен тарафлар көнчыгыш Украинада көч куллануны туктату нияте турында белдерүгә карамастан, бүген Донецкида янә бәрелешләр бара, дип хәбәр итә Азатлык һәм Донецки шәһәр идарәсенең интернет сәхифәсе.
Русия президенты Владимир Путин, сәясәтчеләр Малайзия очкычын бәреп төшерүне "үзләренең тар шәхси мәнфәгатьләрендә" кулланмасын, диде. Русия һәлакәт урынында халыкара тикшерүчеләргә эш шартлары булдыру өчен кулыннан килгәнне эшли, диде Путин 21 июль ясаган чыгышында. Һәлакәттә ул Украина хакимиятләрен гаепләде.
Киев һәм ДНР мәетләрне һәлакәт урыныннан эвакуацияләү турында килеште
Украина хакимияте һәм “Донецки халык республикасы” Малайзия очкычы фаҗигасендә һәлак булучыларның мәетләрен эвакуацияләү турында килеште. Бу хакта һәлакәтне тикшерү Украина хөкүмәте комиссиясе җитәкчесе Владимир Гройсман белдерде.
Очкыч төшкән урында 196 кешенең мәете табылган. Аларны экспертизага җибәрәчәкләр.
“Кара тартмалар” сепаратистлар кулында
Боингның “кара тартмалары” Игорь Безлер (“Бес” кушаматлы) идарәлегендәге сепаратистлар контролендәге Горловкада (Донецки өләсе) булырга мөмкин. Бу турыда “Украинская правда” мәгълүматларына караганда Лугански ватандашлар активисты Дмитрий Снегирев хәбәр иткән.
Аның мәгълүматларына караганда, “кара тармаларны” Суходольски аркылы Изваринога җибәреп анда Русия ФСБсына тапшырмакчылар. Шул ук вакытта игътибарны читкә юнәлтү өчен ыгы-зыгы тудырмакчылар.
Украина вице-премьеры, һәлакәтне тикшерү хөкүмәт комиссиясе җитәкчесе Владимир Гройсман хәбәр итүенчә, барлыгы 192 кешенең мәете табылган
Малайзия белгечләре Украинага килде
Киевка Боинг очкычы һәлакәтен тикшерү өчен Малайзиядән 130 белгеч килгән. Бу хакта вәкиллек җитәкчесе Хилми Моһтар белдерде.
Элегрәк Малайзия хәрби көчләре вәкиле Украинага очкыч һәлакәте сәбәпләрен тикшерү өчен ике хәрби-транспорт очкычы җибәреләчәген әйткән иде.
Киев: сепаратистлар Малайзия очкычы һәлакәтен тикшерүгә аяк чала
Украина хөкүмәте Русиягә таянган кораллы сепаратистлар Донецки өлкәсендә бәреп төшерелгән Малайзия ширкәте очкычы һәлакәтенә катнашлыклары барлыгына бәйле дәлилләрне юк итәргә тырыша, ди. Белдерүдә әйтелгәнчә, сепаратистлар Украина оешмаларына тикшерү башларга мөмкинлек бирми һәм халыкара җәмәгатьчелек белән тышкы ил хөкүмәт вәкилләрен очкыч төшкән урынга кертми. Шул сәбәпле, Украина хөкүмәте халыкара җәмәгатьчелекне тикшерү уздыруга мөмкинлек бирер өчен Русиягә тәэсир итүне сорый.
Украина хөкүмәте белдерүенчә, 38 мәет Донецки моргына китерелгән һәм анда аларны тикшерүчеләрдән башка гына ярачаклар.
Пауэр: Сепаратистлар белгечләрсез генә очкычны бәреп төшерә алмас иде
Малайзия очкычын бәреп төшерүне сепаратистлар хәрби белгечләрсез генә башкара алмаган һәм әлеге белгечләр Русиянеке булыргы мөмкин. Бу хакта АКШның БМО иминлек шурасы вәкиле Саманта Пауэр белдерде.
“SA - 11 (Бук) техник катлаулыгы сәбәпле, сепаратистлар экспертларсыз, бәлкем бу системаны яхшы белгән Русия экспертларыннан тыш кына эшли алмаячак иде”, диде Пауэр БМО иминлек шурасы утырышы барышында.
Моннан тыш, АКШукраин хәрбиләрен бу хәлгә бәйле түгел дип саный.
“Украина хәрбиләрендә SA-11 cистемасы складларда бар, әмма бу район тирәсендә әлеге корал булмаган. Бу кризис башланганнан бирле Украина бер генә ракета да җибәрмәде”, диде Пауэр.
Европадагы иминлек һәм хезмәттәшлек оешмасы вәкилләре Украина көнчыгышында Малайзия очкычы һәлакәте калдыклары урынына тиешлечә эшли алмаган.
Бу хакта Европадагы иминлек һәм хезмәттәшлек оешмасы рәисе Томас Гремингер Reutersка белдерде.
Аның сүзләренчә, төркемдәге 17 күзәтүче һәлакәт булган урында 75 минут торган да һәм хәзер Донецкига кайта. Алар шимбә көнне фаҗига урынына кабат килеп караячагын әйтте.
Гремингер әйтүенчә, күзәтүчеләр һәлакәт урынында кирәк кадәр тора алмаган. Шулай ук ул үзләренең һәлакәт калдыклары янына килүеннән соң Русия тарафлы сепаратистларның куркыту өчен күккә атуын раслый да, кире дә кага алмады.
Элегрәк дөнья җитәкчеләре һәлакәт сәбәпләрен тизрәк тикшерүгә чакырган иде.