Диңгезгә ялга очышлар саны кими
Туроператорлар доллар бәясе үсү сәбәпле, Яңа елдагы ялларга планлаштырылган очышлардан баш тарткан. Pegas Touristik 29 декабрьдә татарстаннарны Төркиягә диңгез ялына алып барырга теләгән, әмма бәяләр күтәрелү сәбәпле бу турдан баш тарканнар. Pegas Touristik-ның Мисырга очышлары да кими. Яңа ел бәйрәмнәре алдыннан Шарм әш-Шәехкә атнасына өч очыш планлаштырылган булса, ул икегә генә калган. Яңа елдан соң атнасына бер йә ике генә очыш булачак, дип белдерелә. Көз башында исә һәр көн саен ике очкыч Казан һава аланыннан Кызыл диңгезгә китәчәк дип планлаштырылган булган. Хургадага килгәндә, алдан атнага ике тапкыр очарга теләгәннәр, әмма хәзер 11 көнгә бер очыш калдырганнар. Anex Tour, Coral Travel и Sunmar Tour ширкәтләре дә очышларны киметкән. Хургадага атнага өч очыш планлашытырылган булса, хәзер ул 7 һәм 11 көнгә берәргә генә калган. Шарм әш-Шәехкә атнага ике тапкыр очарга теләгән булганнар, бу юнәлешне дә 11 көнгә бер тапкырга гына калдырганнар.
Голодец кисәтә: Фәкыйрьләр артачак
Вице-премьер Ольга Голодец якын арада Русиядә фәкыйрьләр артачак диде. Аның сүзләренә караганда, 1.5-3 яшьлек балалары булган гаиләләр аеруча авыр хәлдә калырга мөмкин.
"Балалар бакчасында балалар яхшы каралган, тамаклары тук була. Бакчалар фәкыйрьлектән саклый ала", диде вице-премьер.
Машина бәяләре арта
Декабрь уртасында Казанда Chevrolet салоннарында Chevrolet Aveo 570 мең сумга сатылса, бу ширкәт гынвар аенда сатылачак шундый ук машинага 667 мең сум куйган. Toyota-ның Казандагы үзәге дә Яңа елдан соң машиналарга бәянең 20%-ка кадәр артачагын белдерә. Бу үзәкнең хәзер сатар машиналары беткән.
Apple Русиягә онлайн кибетен япты
Apple ширкәте үзенең интернеттагы Apple Online Store кибетенең Русия версиясен яңарту сәбәпле ябып куйды. Рәсми сәхифәнең баш битендә "Без тиздән кайтырбыз. Без сезнең өчен Apple Online Store кибетен яңарту белән мәшгуль" дигән аңлатма китерелгән.
Ноябрь ахырында кибет бер ябылып торганнан соң шактый күтәрелгән бәяләр белән ачылган иде.
Кибетләргә тауар җибәрү туктатылып тора
Рубльнең нык арзанаюы сәбәпле, сәүдә челтәрләренә һәм кибетләргә тауар җибәрү туктатылып тора. Күпләп сатучылар бәяләрне яңадан билгеләү кирәклеген белдерә һәм яңа бәяләргә риза булмаучыларга тауар җибәрү туктатылачагы турында кисәтә.
РБК агентлыгына Ашан челтәре вәкиле Мария Курносова азык-төлек тауарлары җибәрүчеләр дә, азык-төлек булмаган тауар җибәрүчеләр дә, бәяләр күтәрелмәгән очракта, тауар җибәрүне туктатачаклары турында хәбәр итте дип белдергән.
ИКЕАда чират: халык рубльдән арына
ИКЕА идарәсе 18 декабрьдән соң бәяләр артырга мөмкин дип белдергәч, халык кибетләргә агылды. Казанда да шул ук хәл: кулланучылар бәясе төшкән рубльдән арынырга тырыша. Бераздан ИКЕА сатып алу турындагы мөрәҗәгатьләрнең күп җыелуын һәм аларны эшкәртү өчен вакыт кирәклеген сылтау итеп кухня һәм көнкүреш техникасы сатуны туктатуын белдерде. Аларны сату 20 декабрьдә яңартылырга тиеш диелә.
Кырым энергия кытлыгы кичерә
Җомга көнне Украина, бу атнада икенче тапкыр, Кырымга электр энергиясен бирүне туктатты. Ике көн элек электрның ике сәгатькә өзелеп торуы ярымутрауда хаоска китерә язган иде. Украин рәсмиләре бу адымны Кырымның электрны артык күп куллануы белән аңлатты. Русия карамагына күчкән Кырымның үз энергетика системы әлегә әзер түгел.
"Бәхетле" 600 эшчесен кыскарта ала
"Бәхетле" сәүдә челтәре кризис сәбәпле үзенең хезмәткәрләрен 10%ка, бу якынча 600 кеше дигән сүз, кыскартырга мөмкин. Бәхетле җитәкчесе Мөслимә Латыйпова сүзләренчә, алдан имзаланган килешүгә карамастан, банкларның бер яклы гына кредит өчен түләүне арттыруы бу хәлгә китерергә мөмкин. Ул кредит алган банк идарәчеләренә хат язган. Кредит өчен түләүне күтәрү тауар бәясен арттырачак, эшчеләрне кыскартуга китерәчәк дип белдергән.