Яшьләр Арчада
Форум делегатлары Арчага сәфәр кыла. Кырлайда Тукай музеенда, яңартылган Сәгъди бабай йортында булдылар. Коедан су эчтеләр. Авыл халкы берьюлы 900 кешене күреп шаккатты, хәтта капка төпләренә чыгып утырды. Әбиләр: "Бу кадәр халыкны кайдан җыеп беткәннәр соң, боларны ничек сыйлап бетерерләр инде" дип гаҗәпләнеп утырды.
Кемдер Су анасы, Апуш белән фотога төште, кемдер намаз вакыты җитте дип, аптырап тормыйча, чирәмдә гыйбадәт кылды. Кырлайдагы Тукай музеен күреп кемдер: "Ничего себе Тукай дом отгрохал! Еще пруд есть!" дип Тукайның буржуаз тормышына гаҗәпләнеп аның күчемсез милеген санады.
Табын әзерләү мәшәкате Арча укытучылары җилкәсенә төшкән. Өч көн әзерләндек, диләр. Бер кеше өчен кичке аш 300 сумга төшкән.
Форум яшьләрен сыйлау, аларга ризык әзерләү эшен Арчаның "Быт сервис" ширкәте башкарган. Мең ярым кеше өчен 7 казанда пылау пешерелгән.
Форумда катнашучы кумык, нугайлар: "Федераль үзәк, түрәләр үз телебездә яшәүгә кыенлык тудыра"
Татар яшьләре форумында катнашучы кумык егете Арслан һәм нугай егете Рәхим Азатлыкка туган телләренең хәле турында фикерләрен белдерде. “Без телебезне беләбез, гаиләдә, урамда яшьләр туган телдә сөйләшә, әмма белем алу, дәүләт имтиханнары русча, федераль үзәк телебезгә каршылык тудыра”, ди алар.
Путинлы Талип: "Мин патриот, Путин татарларга каршы түгел"
Форумның беренче көненнән Мамадыштан килгән 18 яшьлек Талип Миңнегалиев путинлы футболкасы белән игътибарны җәлеп итте. Азатлык хәбәрчесе Талип һәм Руслан белән якыннан танышты. Ни өчен Русия президенты төшкән футболка киюе, нинди татар газетлары укулары белән кызыксындык.
Форумчылар Арчада бәйрәм итте
Татар яшьләре форумының өченче көне азагында делегатлар Арчада булды. Үзәк стадионда алар өчен бәйрәм, Сабантуй ярышлары, концерт оештырылды. Азатлыкка Башкортстаннан килгән егет-кызлар хис кичерешләре белән уртаклашып, мәктәптә өйрәнелгән Тукайның Арча якларында булуларына шатлануларын әйттеләр.
Форумның соңгы көне. Иртәнге сәгать алтыда делегатлар Болгарга юл тотты. Берничә сәгать дәвамында алар музей-тыюлык белән танышачак. Шуннан соң, Казанга кайтып, "Печән базары" фестивалендә катнашырлар дип көтелә. Сүз уңаеннан, "Печән базары"на казанлылар да катнаша ала, ул көндезге бердән кичке сигезгә кадәр дәвам итәчәк.
Кабан күле буенда сату-алыш, Печән базары кыза бара. Һавасы бик эссе, якынча 35 градус эссе. Халык сусый, су артыннан зур чират хасил булды. Печән базарында Камал театры артистлары да күпләп чыккан. Люция Хәмит белән Миләүшә Шәйхетдинова күн эшләнмәләреннән акча янчыгын озак сайлады. Китап сатучылар да күп, әмма аларны сатып алучылар гына күренми. Балалар өчен аерым мәйданчыкта курчак тамашасы күрсәтелә. Тарихчы Нияз Халит белән архитектор Айвар Саттар Иске татар бистәсе буйлап экскурсия оештыра.
Печән базары чараларында якынча инде җиде меңләп кеше катнашты, дип белдерде Бөтендөнья татар яшьләре форумының яңа сайланган рәисе Тәбриз Яруллин.
