Сишәмбе Татарстанның Биектау районы мәхкәмәсе татар милли хәрәкәте активисты Айрат Шакировны 100 мең сум штрафка тарту карары чыгарды. Әмма җинаять эшенең вакыты чыгу сәбәпле, ул әлеге хөкем карарын үтәүдән азат ителә. Шакиров ВКонтакте челтәренә Дагыстанда мөселманнарны эзәрлекләүгә каршы митинг видеосын элүдә һәм моның белән экстремизмга өндәүдә гаепләнде. Шакиров ул видеоны үзе элмәгәнлеген белдерде.