25 октябрь Татарстан Халыклар дуслыгы йортында Татарстанда тел сәясәтен камилләштерү, рус һәм татар телләрен укытуны җайга салуга багышланган киңәшмә узды. Татарстан мәгариф министрлыгы, Дәүләт шурасы һәм мәгариф оешмалары вәкилләре катнашкан чарадан соң Татарстан президенты идарәсенең эчке сәясәт бүлеге башлыгы Александр Терентьев анда катнашканнарның Татарстан мәгариф министрлыгы тәкъдим иткән уку планын хуплап уртак фикергә килүен белдерде.