Быелгы Олимпия уеннарында катнашучы Русия спортчыларының тагын берсенең татар тамырлары булуы ачыкланды. Бу турыда интернет кулланучылар язып чыкты. Ски-кросста чыгыш ясаучы Сергей Ридзик әнисе ягыннан Татарстан егете. "Ридзикның әнисе татар, тамырлары Татарстаннан: бабасы Тәтештән, ә әбисе Тукай районыннан. Әнисенең исеме Нәзирә Вәли кызы", дип язган Челтәрдә бер ханым. Ул үзен Сергейның әнисенең икетуганы дип атый.
Бу сүзләрнең дөреслеген ачыклау мөмкин булмады, ләкин спортчының татарлар белән бәйләнеше барыбер бар. Сергей Ридзикның шәхси тренеры – Тәлгать Сәяпов.
Тәлгать Сәяпов 1982 елның 10 октябрендә туган, Мәскәүдә яши. Халыкара класслы спорт мастеры (фристайл, могул). Европа касәсе җиңүчесе (2003).
Сергей Ридзик исә 1992 елның 25 октябрендә, Кольски ярымутравында Мончегорски дигән кечкенә бер шәһәрдә дөньяга килгән. Русиянең спорт мастеры. Дөнья касәсе этабының икеләтә призеры.
Сергей спортка үзен нәкъ менә әнисе китерүен әйтә. "Безнең шәһәр кечкенә, монда ике генә юл мөмкин иде – йә наркоман буласың, яки спорт белән шөгыльләнәсең. Әнием мине спортка илтте", дип рәхмәт хисләре белән искә ала спортчы.
Сергей Ридзик катнашындагы ярышлар 21 февральдә Казан вакыты белән 05:30да башланып китәчәк.
19 февраль, 10нчы көн, медальләр
| алтын | көмеш | бронз | |
| 1 Норвегия | 11 | 9 | 8 |
| 2 Германия | 10 | 6 | 4 |
| 3 Канада | 6 | 5 | 6 |
| 4 Нидерланд | 6 | 5 | 2 |
| 5 АКШ | 5 | 3 | 2 |
| - - - - - - | |||
| 18 Украина | 1 | 0 | 0 |
| 19 Кытай | 0 | 5 | 2 |
| 20 Русиянең олимпия атлетлары | 0 | 3 | 8 |
Бүген узган хоккей матчында Русия хатын-кызлар такымы Канадага 0:5 исәбе белән җиңелде. Әммә алар барыбер ярымфиналга чыгып Финляндия такымы белән 3нче урын өчен көрәшәчәк. Уен 21 февраль Казан вакыты белән сәгать 10:40та була. Исегезгә төшерик, Русия такымында өч татар кызы бар – Фәнүзә Кадыйрова, Лиана Ганиева һәм Диана Канаева.
20 февраль, 11нче көн, медальләр
| алтын | көмеш | бронз | |
| 1 Норвегия | 11 | 10 | 8 |
| 2 Германия | 11 | 7 | 5 |
| 3 Канада | 8 | 5 | 6 |
| 4 Нидерланд | 6 | 5 | 3 |
| 5 Франция | 5 | 4 | 4 |
| 6 АКШ | 5 | 3 | 4 |
| - - - - - - | |||
| 20 Русиянең олимпия атлетлары | 0 | 3 | 8 |
УКУЧЫ ФИКЕРЕ: Унбиш яшьлек Алинә Заһитова кыска програмда дөнья рекордын 82,92 баллга җиткереп, Олимпиаданың хатын-кызлар бәйгесендә беренче урынга чыкты. Евгения Медведеваның бүген үк ирешелгән яңа рекорды (81,61 балл) нибары 10 минут кына яшәде. Өченче урында Канада кызы Кейтлин Осмонд — 78,87 балл. Ләкин бу әле көрәшнең башы гына. Нәтиҗәләр иртәгә билгеле булачак.
Русия спортчысы Сергей Ридзик ски-кросс ярышында бронза яулады. Бу әлеге төр ярышларда Русия спортчылары арасында тарихта беренче медаль.
Сергейның әнисе татар, тамырлары Татарстаннан: бабасы Тәтештән, ә әбисе Тукай районыннан. Әнисенең исеме Нәзирә Вәли кызы.
Ридзикның шәхси тренеры да татар кешесе – Тәлгать Сәяпов.
Сергей үзе 1992 елның 25 октябрендә, Кольски ярымутравында Мончегорски дигән кечкенә бер шәһәрдә дөньяга килгән. Русиянең спорт мастеры. Дөнья касәсе этабының икеләтә призеры.
Хоккей ярышында Русия хатын-кызлар такымы бронз медаль яулый алмады, алар 3:2 исәбе белән Финләндиягә оттырды. Ләкин дүртенче урын да Русия хатын-кызлар такымы өчен яхшы күрсәткеч, бу әлегә аларның иң югары нәтиҗәсе. Моңарчы Русия кызларның Олимпиада уеннарында мондый уңышка ирешә алганнары юк иде.
Исегезгә төшерәбез, Русия такымында өч татар кызы бар – Фәнүзә Кадыйрова, Лиана Ганиева һәм Диана Канаева.
Казан егете Руслан Сәмитов ике кешелек бобларда узышуда медаль яулый алмады. Ул чананы этеп, тизлек бирүче спортчы буларак Юрий Селиховны алыштырды һәм пилот Максим Андриянов белән чыгыш ясады. Селиховны аның имгәнүе аркасында алыштырырга туры килде. Спортчыларның өчесе өчен дә Пхенчхандагы уеннар аларның үз гомерләрендә беренче Олимпиадалары.
Бобслейда киләсе ярышлар дүрт кешелек чаналарда уза, ярыш 24 февраль, шимбә көнне Казан вакыты белән иртәнге 3:25 тә башлана. Русланның бу узышта катнашу-катнашмавы әлегә билгесез, дүртлеккә кемнәрнең керәчәге күнегүләрдән соң билгеле булачак.