Җомга кич пленар утырыштан соң тамак ялгап алгач яшьләрне “Эрмитаж” күңел ачу үзәгендә оештырылган дискотекага җыйдылар. Бу чара беренче тапкыр оештырылды. Форум рәисе итеп кабат сайланган Тәбрис Яруллин элекке елларда яшьләрнең төрле урыннарга таралуын искә алып быел форумның шундый үз чарасын оештыру турында белдерде. Анда K-RU, MALSI Music һәм USAL төркемнәре чыгыш ясады.
Шимбә иртәсендә форумчылар Болгарга юл тотты. Кичәге концерттан соң йокылары туймаган. Өч сәгать кенә йоклап юлга чыгучылар да бар. Ярты юлга җиткәч коры паек өләштеләр.
Програмда делегатларның Болгарга баруы башта булмаган. Татарстанның төрле районнарына, Арча, Балтачка бару каралган иде. Әмма форумга ике көн кала Миңтимер Шәймиев конгресска шалтыратып "Ничек инде яшьләр Болгарны күрми китәмени" дигән. Шулай да чит илдән килгән делегатларны (якынча 100 кеше) Балтач та кунак итә.
Илнар Фатыйхов: "Вата-җимерә булса да татарча сөйләшегез!"
АКШ делегаты Илнар Фатыйхов Азатлыкка, чит илдә яшәсәләр дә, татар телен саклап калырга тырышуларын әйтте. Әмма кайбер татар яшьләре активистларының форумга килеп үзара урыс телендә аралашуы кызганыч, бу мине борчый, диде ул. Илнар татарча начаррак белүчеләрне вата-җимерә булса да татарча сөйләшергә өндәде.
Болгарда делегатларның бер төркемен Икмәк музеенда урнашкан ашхәнәгә алып кертеп ашаттылар. Бер заман яшьләр матур итеп аралашып утырган арада ашхәнә хезмәткәрләре ишекләрне бикләп куеп: "Берегез дә чыгып китми, без полиция хезмәткәрләрен чакыртабыз" диләр. Баксаң, чәй өстәле янында торган ром исерткеч эчемлеге шешәсе юкка чыккан икән. Яшьләр бер-берсенә каранып "Тикшерез, безнең арада аракы эчүчеләр юк" дип аптырап калды. Берничә минуттан ашхәнә хезмәткәрләре бер сүз дәшмичә ишекләрен ачып, яшьләрне чыгарып жибәрде. Шешә табылган күрәсең.
Татар ата-аналары берләшмәсе туган телләрне үстерү фондын ачмакчы
Татар яшьләре форумында туган телләрне үстерү фонды кирәклеге әйтелде. Фондның төп эшчәнлеге туган телдә белем бирә торган мәктәпләр ачуга юнәлергә тиеш диелде. Бу хакта Азатлыкка Татар ата-аналары берләшмәсе активисты Ксения Зарипова сөйләде.
Рәшит Сюняев: "Оныкларымның татар телен өйрәнүен теләр идем"
Татар яшьләре форумы кунагы, дөнькүләм танылган галим Рәшит Сюняев форум кысаларында Азатлыкның татар теленең киләчәге турында соравына җавап биреп, аны фаразлау бик авыр диде һәм уңай мисал итеп Европада туган телләрне өйрәнү өчен тудырылган мөмкинлекләр турында сөйләде.
Җомга көнне форумда катнашучылар өчен махсус оештырылган лекциядә күренекле астрофизик Рәшит Сюняев яшьләргә татар астрономик атамалар турында сөйләде.
Бүген Казанда Дөнья татар яшьләре форумы тәмамлана. Яшьләр йөз елдан татарны ничек күзаллый? Телне саклау өчен нишләргә кирәк, иң үтемле чаралар нинди? Әлеге сорауларны Азатлык Дөнья татар яшьләре форумы делегатларына бирде.
5 август Дөнья татар яшьләре форумының соңгы көнендә җыенда катнашучы делегатлар "Печән базары" фестивалендә кунак булды. Иске татар бистәсендә төзекләндерү эшләре алып барылу сәбәпле ул быел да Черек күл паркында узды.
"Печән базары – 2018" мизгелләре