Керичта дәүләт оешмалары ябылган
Бу хакта Азатлыкка Керичта яшәүче Сәрия Бекирова хәбәр итте. "Керич халкын урамга чыкмаска чакырдылар, кайбер оешмалар эвакуацияләнгән. Һөҗүм итүче белән тагын ике кеше булган, алар качкан дип сөйлиләр. Барлык хастаханәләрнең морглары тулган, үлүчеләр саны 19га җиткән, күбесе беренче курс укучылары. Шартламый калган тагын бер шартлаткыч табылган. Корбаннарның гаиләләренә 1 млн сум компенсация биреләчәге игълан ителде. Керичта 25 ел яшибез, мондый фаҗига беренче тапкыр былды" диде Сария ханым.
Керичка Кырым башлыгы Сергей Аксенов, Кырымның сәламәтлек саклау министры Александр Голенко һәм Русия сәламәтлек саклау министры Вероника Скворцова килгән.
Русия медиасы Керич фаҗигасендә "татар эзен" эзли
Русиянең Lenta.ru сайты һәм башка матбугат чараларының, Керич көллиятендә һөҗүмне 23 яшьлек "татарга охшаган" кеше башкарган, дигән хәбәр татаруын Кырымтатар мәҗлесе рәисе Рефат Чубаров хөкем итеп чыкты.
"Бу фаҗиганең "татар эзе" турында хәбәрне Русиянең йөзләрчә матбугат чаралары күчереп бастыруы Русия оккупантларының Кырымда кырымтатарларга каршы яңа репрессияләр, эзәрлекләүләр башларга әзер булулары хакында сөйләргә мөмкинлек бирә. Бу фаҗига өчен оккупацияләүче хакимиятләр һәм Русиянең үзәк хакимиятләре үзләре җаваплы" дип белдерде ул Facebook битендә.
Кырымтатар мәҗлесе корбаннарның гаиләләренең кайгысын уртаклашты.
Адвокат Николай Полозов Русия хакимиятләре бу террор гамәлен кырымтатарларга каршы репрессия оештыру өчен кулланмакчы дигән борчылу белдерде. "Ахырсы Кремль кырымтатар мәсьәләсен хәл итәргә карар кылган. Кырым оккупациясенә кадәр монда бернинди теракталар да юк иде" дип белдерде ул Facebook битендә.
"Татар эзе" турында хәбәр таралып берничә сәгәть узга Русиянең Тикшеру комитеты һөҗүмченең Владислав Росляков булуын белдерде.
Lenta.ru хәбәреннән "татарга охшаган" дигән сүзләр алынды.