Сугыш көндәлеге. Беренче 85 көн

Украинага каршы сугыш башлаган Русия бу көннәрдә Икенче дөнья сугышы тәмамлануның 77 еллыгын бәйрәм итәргә әзерләнә. Русия хакимияте өчен 9 Май - Җиңү бәйрәме мөһим, изге даталарның берсе. Һәм соңгы елларда ул патриотизмы көчәйтү коралына әверелде.

Сугыш афәтен үз башыннан кичергәннәр аның коточкыч фаҗига булуын искә ала. Аерым алганда әти дип әйтергә тилмереп узган ятим балачак, ачлык һәм ялангачлык, миһербансызлык һәм вәхшилек турында алар Азатлыкка да сөйләгән иде.

Башкортстанның Федоровка районы Өчбүләк авылыннан 91 яшьлек Миңнияр Мәсәгутовка сугыш башланганда 10 яшь була. Ул сугыш башланган, әтисенә "повестка" тоттырылган, авыл ирләре сугышка киткән көннәрне ачык итеп хәтерли. Ил утка хәерче булып керде дип сөйли Миңнияр абый.

Төп бит.
Көзге бит.

Музыкантлар "Крещатик" метро станциясендә шәһәр халкы алдында чыгыш ясады. Алар үзләренең төп хитларын, шул исәптән Русия Украинага бәреп кергәннән соң җирле саклану сафларына кушылган "Антитіла" төркеме белән, Stand by Me җырын Stand by Ukraine дип җырладылар.

"Ел саен 8 майда, бөтен цивилизацияле дөнья белән берлектә, без Икенче дөнья сугышы вакытында дөньяны нацизмнан саклаган һәр кешегә хөрмәт күрсәтәбез. Миллионлаган кеше гомерен өзгән һәм язмышын җәберләгән явызлыкка “беркайчан да кабатланмаячак” дибез!

Ата-бабаларыбыз түләгән бәяне без белә идек. Аны саклау һәм буыннан-буынга тапшыруның никадәр мөһим икәнен белә идек. Ләкин безнең буын бу сүзләрнең башкача кулланылышына шаһит булыр дип күз алдына да китермәдек.

Быел без "беркайчан да кабатланмаячак" дигән сүзләрне башка төрле кабатлыйбыз. "Беркайчан да кабатланмаячак"ны башкача ишетәбез. Бу газаплы, рәхимсез яңгырый. Өндәүсез, ә сорау билгесе белән яңгырый...

24 февральдә “беркайчан” да сүзен бетереп ташладылар. Утка һәм бомбага тоттылар. Бөтен Украинаны уятып, иртәнге дүрттә йөзләрчә ракета җибәрделәр. Без коточкыч шартлаулар ишеттек. Кабат ишеттек”, диде Зеленский.

Икенче дөнья сугышында җиңүнең 77 еллыгы уңаеннан Путин Азәрбайҗан, Әрмәнстан, Беларус, Казакъстан, Кыргызстан, Молдова, Таҗикстан, Төркмәнстан, Үзбәкстан, Абхазия, Көньяк Осетия, “ДНР” һәм “ЛНР” лидерлары һәм ватандашларына, шулай ук Грузия һәм Украина халкына котлау сүзләре җибәрде, дип хәбәр ителә Кремль сәхифәсендә.

“ДНР” һәм “ЛНР” лидерлары һәм ватандашларына котлауда:

"Бүген, безнең хәрбиләр, ата-бабалары кебек үк, туган якларын нацист пычраклыгыннан азат итү өчен иңгә-иң куеп көрәшә. 1945 елдагы кебек үк җиңү безнеке булачагына ышана", диелә котлауда.

Луһанскида мәктәп бинасына эләккән бомба нәтиҗәсендә 60 кеше үлгән булуы мөмкин. Бу хакта өлкәнең хәрби идарәсе башлыгы Сергей Гайдай хәбәр итә.

Бомбаның бинага эләгүе нәтиҗәсендә янгын чыга. Аны бары дүрт сәгатьтән соң гына сүндерә алалар. Өемнәр астыннан ике кеше мәете табыла, 30 кеше эвакуацияләнә, 60 кеше әле дә җимерекләр астында кала. Мәктәптә барлыгы авылдан эвакуацияләнергә җитешмәгән 90 кеше яшеренгән була.

Украинадагы сугышка теләктәшлек билгесе булган Z тамгасы белән Казан урамындагы рекламның чираттагысы.

Z хәрефе Русиянең Украинага бәреп керү символына әйләнде. Социаль челтәрләрдә аны яңа свастика дип тә атыйлар.

• Русия гаскәрләре Луһански өлкәсендәге Белогоровка авылындагы мәктәпкә бомба ташлаган, анда якынча 90 кеше яшеренгән булган. 30 кешене өемнәр астыннан чыгара алганнар, коткару чарасы дәвам итә, дип яза өлкәнең хәрби идарәсе башлыгы Сергей Гайдай.
• Украина кораллы көчләренең "Юг" оператив хәрби идарәсе Русия тарафыннан Одессага ракет һөҗүме ясалуы турында хәбәр итә. Ракетлар җиһаз җитештерүче шәхси ширкәткә, һава аланындагы күптән түгел генә җимерелгән очыш юлларына һәм очышлар белән идарә итү пунктына эләккән. Шартлаудан күпкатлы йортлар да зыян күргән.
• "Азовсталь"дан соңгы эвакуация вакытында өч хәрби үтерелде, тагын алты кеше яраланды, диде Украина кораллы көчләре хәрби-диңгез флотының 36нчы бригадасы командиры Серхий Волынский ("Волын").
• Роскосмос башлыгы Дмитрий Рогозин шимбә көнне Казакъстандагы Байконур космодромында Британия ватандашы Бенджамин Рич һәм Беларус ватандашы Алина Зелупаның тоткарлануы турында хәбәр итте. Матбугат чаралары билгеләп үткәнчә, Бенджамин Рич - "Лысый и обанкротившийся" каналын алып баручы танылган британ блогеры. Бу каналга 3 миллионнан артык кеше язылган, ә караулар саны 450 миллионнан арта. Рич күп вакытын Беларуста уздырган һәм анда берничә дистә видеоролик төшергән, дип яза Азатлык радиосының беларус хезмәте.
• Австриянең Raiffeisenbank International (RBI) төркеме үзендә корреспондент хисаплары ачкан берничә Русия банкы белән элемтәләрне өзде.

Мариупольдә "Азовсталь" заводыннан бөтен хатын-кызлар, балалар һәм картлар эвакуацияләнгән дип белдерде Украина вице-премьеры Ирина Верещук.

6 майда Украина президенты Офисы завод җирлегеннән 500 кешенең чыгарылуы турында хәбәр иткән иде. Соңрак Ирина Верещук тагын 50 кешенең чыгуы турында белдерде.

"Азовсталь"дә сивил халыктан тыш, "Азов" полкы сугышчылары да бар. Бу Русия гаскәре уратып алган шәһәрдә Украина көчләре калган соңгы урын. Русия хакимиятләре аларны әсирлеккә төшәргә чакырды, алай иткәндә исән калдырачакбыз дип вәгъдә бирде, ләкин Украина хәрбиләре моннан баш тартты.