Британия һәм Швеция иминлек гарантияләре турында килешү имзалады
Әлеге килешү нигезендә ике илнең күзләү хезмәтләре арасында тыгыз хезмәттәшлеге, өстәмә уртак күнегүләр уздыру күздә тотыла, ә Швециягә һөҗүм булган очракта, Британия хәрби ярдәм күрсәтергә тиеш булачак.
Якын арада нәкъ шундый ук килешү Финляндия белән дә имзаланачак.
Элегрәк Швеция һәм Финляндия НАТОга кушылу теләген белдергән иде.
Сугыш йогынтысы. Рубль озакка чыдармы?
Русия хакимияте рубльнең АКШ долларына һәм еврога карата көчәя баруын белдерде. Үзәк банк исәпләвенчә, узган атна ахырында 1 доллар 66 сум торган. Ә Русия Украинага бәреп кергән атнада рубль ул бәядән ике мәртәбә арзанрак иде.
"Idel.Реалии" Лондондагы "Капитал экономикс" (Capital Economics Ltd) ширкәтенең рубль курсы нигә шулай булуны һәм мондый курсның икътисадка файдалы булу-булмавын аңлатучы хисабын өйрәнгән.
Белгечләр фикере белән монда таныша аласыз.
Русия Украина аша газ җибәрүен дәвам итә
Русиянең "Газпром" ширкәте Украинаның газ-транспорт системы белән Украина аша 72 миллион кубометр газ җибәрү турында килешкән. Әлеге газ "Суджа" станциясе аша куылачак, бу станция Украина контролендә.
Русия тарафлы фетнәчеләр яулап алган "Сохрановка" станциясе аша газ җибәрү туктатылган дип хәбәр ителә.
Херсонның оккупацион хакимияте вәкиле төбәкне Русиягә кушарга ниятләүләрен белдерде
Херсонның Мәскәү билгеләп куйган оккупацион хакимияте башлыгы урынбасары Кирилл Стремоусов сүзләренчә, алар бу үтенеч белән Русия президенты Владимир Путинга мөрәҗәгать итмәкче була.
Элегрәк бу шәһәргә сәфәре вакытында "Бердәм Русия" баш шурасы сәркатибе Андрей Турчак, Русия монда "мәңгегә" калачак, дип белдергән иде.
Украинадагы сугышта Башкортстаннан тагын бер кеше һәлак булган. Учалының Илче авылыннан 1986 елгы Марат Мөхәммәдиев белән иртәгә авыл мәдәният йортында хушлашачаклар дип яза "Говорит и показывает Учалы" Вконтакте бите.
Мариуполь мэры шәһәрдә 150-170 меңләп кеше калуын белдерде
Ел ахырына кадәр Мариупольдә төрле чирләрдән һәм түзеп булмаслык шартлардан 10 меңнән артык кеше үләргә мөмкин, дип хәбәр итте Мариуполь мэры Вадим Бойченко. Аның мәгълүматларына күрә хәзер шәһәрдә 150-170 мең кеше бар.
Мариупольдән Чаллыга китерелгән балаларга сәламәтләндерү аланнарына юллама бирәчәкләр
Фетнәчел "Донецки халык республикасы"ның Мариуполь шәһәреннән Чаллыга китерелгән балалар Чаллы читендәге сәламәтләндерү аланнарында ял итә алачак. Бу хакта 11 майда шәһәр мэры Наил Мәгъдиев хәбәр итте, дип яза Chelny-biz басмасы. Мэр балаларның ата-аналары белән таныштыру эшләре уздырырга кушкан, аланнарда нинди шартлар булуын күрсәтергә кирәк, дигән.
"Бу балалар сигез ел пулялар һәм бомбалар астында яшәгән, алар тыныч күк йөзе астында яшәргә тиеш. Безнең Чаллыда шулай. Аланнарда уңайлы шартларда яшәячәкләр, алар балалар мохитендә булырга тиеш", дигән Наил Мәгъдиев. Ул бу балаларга аерым игътибар" бирергә кушкан.
Тулырак монда.
АКШ Конгрессы Украинага ярдәмгә тагын $40 миллиард бүлеп бирде
АКШ Конгрессының вәкилләр пулаты Русия һөҗүменә дучар булган Украинага хәрби, икътисади һәм һуманитар ярдәмгә 40 миллиард доллар бүлеп бирүне күз уңында тоткан канун өлгесен хуплады.
Бу – Джо Байден хакимияте сораганнан 7 миллиардка артык.
Март аенда Конгресс Украинага 13,6 миллиард бүлеп биргән иде инде.
Сенат канун өлгесен хупласа, сугыш башыннан бирле Украинага күрсәтелгән ярдәм 50 миллиард доллардан артып китәчәк.
Тулырак монда.