Роскомнадзор медиада дәүләт цензурасы кертте
Роскомнадзор матбугат чараларыннан Украинадагы сугыш турында бары Русия дәүләт чыганаклары биргән мәгълүматны гына куллануны таләп итте.
Оешманың рәсми сайтында шундый белдерү чыкты.
Роскомнадзор шулай ук “ялган мәгълүмат таратканнарга” 5 млн сум штраф салу һәм аларның сайтларын томалау белән янады.
— Ассызыклап белдерәбез, нәкъ менә Русия рәсми мәгълүмат чыганаклары гына дөрес һәм актуаль мәгълүмат тарата”, диелә оешма белдерүендә.
"Сетевые Свободы” хокук яклау проекты рәсми чыганактан алынган мәгълүматны куллану таләбе Киңкүләм мәгълүмат чаралары турындагы канунның 47нче маддәсенә каршы килә, чөнки ул канун журналисттан мәгълүматның дөреслеген тикшерүне таләп итә дип белдерде.
Бер кеше һәлак булган, биш кеше яраланып хастаханәгә салынган. Украина үзәгендәге Черкасски өлкәсенең Умань шәһәрендә Русия ракетасы төшкән бер урында менә шундый хәл. Русия тыныч халыкны бомбаламавын, бары Украина хәрби корылмаларын гына утка тотуын белдергән иде.
Иртән Кырым белән Украина арасындагы административ чиктән сивил кешеләр үз машиналарында Акмәчеткә таба агыла башлаган, юлларда тыгыннар барлыкка килгән дип сөйләде Азатлыкка шул юлдан Акмәчеткә эшкә барган Эльвина исемле кырымтатар хатыны.
— Шул юлдан ирем белән машинада барганда лесопосадкаларда Русия хәрбиләрен, бик күп БТРлар торганын күрдек, чик ягыннан атыш тавышлары ишетелә иде, диде ул.
Кырым-Украина чигендә "Чонгар" һәм "Каланчак" чик капкалары аша Украинадан килүче украин гражданнары өчен ябык, Русия чик сакчылары Кырымга бары тик Русия паспорты булганнарны гына кертә.
Кырымда чик буенда урнашкан Әрмени базар (Армянск), Акмечет (Черноморский), Җиде Къую ( Ленинский), Ор Къапу (Красноперекопск), Джанкой районнары, Керич шәһәрендәге мәктәпләрендә укулар туктатылды. Әрмени базар шәһәреннән китүчеләрне Ор Къапу шәһәренә күчерү оештырылган дип хәбәр итте Кырымның гәдәттән тыш хәлләр хезмәте.
Мәскәү тарафыннан куелган Кырым башлыгы Сергей Аксёнов Путинның Украинага һөҗүм башлау карарын тулысынча яклавын, Кырымның Төньяк каналын Украинадан су кабул итү өчен әзерләргә күрсәтмә биргәнен хәбәр итте.
Русиядә хокук яклаучы Марина Литвинович Русия халкын 24 февральдә 19:00дә үзләре яшәгән шәһәрнең үзәк мәйданына чыгып, Украинага каршы сугыш башлауга ризасызлык белдерергә чакырды.
Видеомөрәҗәгатен Литвинович Facebook-та чыгарды.
— Владимир Путинның безгә карата дустанә мөнәсәбәттәге Украинага һөҗүм итүе сәбәпле күбегезнең өметсезлек, көчсезлек һәм оят хисләре кичерүен беләм. Әмма мин өметсезлеккә бирелмәскә, бүген 19 сәгатьтә үз шәһәрегезнең үзәк мәйданына чыгарга чакырам. Без Русия халкы Путин башлаган сугышка каршы дип ачык итеп белдерергә кирәк. Без бу сугышны якламыйбыз, ул безнең исемнән алып барылмый, без бу сугышка каршы. Бернидән дә курыкмагыз, мәйданнарга чыгыгыз һәм ачык итеп әйтегез”, ди Литвинович.
Бүген Русиянең күп кенә шәһәрләрендә Украинага каршы сугыш башлауга протест белдереп ялгыз пикетлар узды һәм уза. Анда катнашучыларның күбесен полиция тоткарлаган.
Азат Бадранов Путинның сугыш башларга "мәҗбүр булуын" белдерде
Башкортостан вице-премьеры урынбасары Азат Бадранов Русиянең Украинага каршы сугыш башларга “мәҗбүр булуын” белдерде. Ул моны “безнең чикләр янында инде сигез ел буе дәвам иткән башбаштаклыкны туктату зарурлыгы белән аңлата.
“Кызганыч, тыныч юл белән чишеп булмады”, ди Бадранов. Ул “Мински килешүләренең үтәлмәвен” дә әйтте.
Башкортостан вице-премьеры урынбасары “хәрби чара” “тиз һәм тыныч халыкка зыян китермичә, каршы якның хәрби инфраструктурасын һәм көчләрен юк итү белән генә”, тәмамланыр дип өметләнүен белдерде.
Русиядә сугышка каршы протест чараларына чыккан 49 кеше тоткарланган
Моның хакта ОВД-инфо проекты хәбәр итә. "Без төгәл 11 шәһәрдә 49 тоткарланган кеше турында беләбез", диелә. Тоткарланучылар арасында кичке вакытта Русия буйлап сугышка каршы протест чараларына чыгарга өндәгән Марина Литвинович та бар.
Казанның Универсиада авылында сугышка каршы плакатлар эленгән
Плакатларда "Сугышка юк", "Сезнең һәм безнең азатлык өчен", "Аннексиягә юк! Путинга юк! Сугышка юк!" шигарьләре язылган булган.
Бераздан плакатларны алып куйганнар.
Фото: "Ветер" студентлар журналы.
