Европа берлеге Русиягә каршы яңа чикләүләр турында килеште
Европа берлеге илләре җитәкчеләре Мәскәүгә каршы яңа чикләүләр турында килеште. Чикләүләр Русиянең энергетикасына, транспортына, тыныч максатларда да, корал җитештерүдә дә кулланылырдай ике билгеләнешле тауарларга, кайбер виза мәсьәләләренә кагылачак. Шулай ук Брюссель физик затларның "кара исемлеген" киңәйтәчәк. Нечкәлекләре әлегә ачыкланмады. Тулырак биредә укый аласыз.
Русия һава һөҗүменнән метрога сыенган Киев халкы турында безнең фотогалереяны карагыз
Киев халкы Русия һава һөҗүменнән куркып метрога сыена
Украина президенты Бухарест килешүенең 9 иленә мөрәҗәгать итеп, Киевка саклану ярдәм бирүен сорады.
"Бу хакта Польша президенты Анджей Дуда белән сөйләштем. Без Русияне килешүләр өстәле янына утыртырга тиеш. Безгә сугышка каршы коалиция кирәк", дип язды Владимир Зеленский Twitter-ында.
Бухарест килешүе (Bucharest Nine, B9) Үзәк һәм Көнчыгыш Европа илләрен берләштерә, аңа Болгария, Маҗарстан, Эстония, Литва, Латвия, Польша, Романия, Словакия, Чехия керә.
Җырчы Земфира сугышка каршы чыкты
24 февраль кичендә Мәскәүдә узган концертында җырчы Земфира "бездә барыбызда да җиңел булмаган көн булды" дигән һәм "Атмагыз" ("Не стреляйте") җырын башкарган.
Төнлә исә җырчы социаль челтәрләрдә "миңа моңсу, авыр, мин елыйм, мин сугышны теләмим. Һәм мин куркак түгел" дип язып чыккан.
Росавиация: Русия Британиягә бәйле яки Британиядә теркәлгән очкычларны илгә очып килүен һәм транзитын тыя
Бу чикләү Британиянең Аэрофлотка караган санкцияләргә җавап буларак кабул ителә.
Авиация белән кызыксынучы журналист Алексей Пивоваров британ һава ширкәтләренә тразит та тыела икән, алар транс-себер маршрутын куллана алмаячаклар ди. "Бу Төньяк Европадан Ерак Көнчыгышка иң кыска юл булып тора һәм Лондоннан/Лондонга очучы дистәләргән очкыч аны көн саен куллана", ди ул.
Ростуризм: Һава аланнары ябылу сәбәпле Русия шәһәрләреннән 150 меңләп турист очып китә алмый
Русия Туризм федераль агентлыгы, һава аланнары ябылу сәбәпле, Русия төбәкләрендә 150 меңләп турист калуын, аларның 2 мартка кадәр очып китә алмаячагын хәбәр итте.
Ростуризм мәгълүматларына күрә, алар арасында юллама сатып алган 25 мең турист бар, сәяхәтчеләрнең күпчелек өлеше аннексияләнгән Кырымда һәм Краснодар краенда кала.
Элегрәк Русиянең Украинага һөҗүме нәтиҗәсендә, илдә кайбер очышлар туктатылуы хәбәр ителгән иде.
Казаннан да берничә очыш туктатылды, аерым алганда Минеральные воды, Сочи һәм Шарм-әш-Шәйхка очкычлар вакытлыча очмый.
Тулырак биредә укый аласыз.
Чернобыльдә нурланыш арткан
Чернобыльдә нурланыш дәрәҗәсенең артуы теркәлгән. Бу турыда Украина дәүләт атом-төш идарәсе хәбәр итә.
Идарә белдерүенчә, 1986 елгы казадан соң ябылган һәм саркофаг белән капланган элекке атом электр станциясенә якын урыннарда автомат күзәтү системы нурланышның шактый артуын күрсәткән.
Идарә белдерүенчә, бу төбәкне Русия хәрбиләре басып алу сәбәпле, нурланышның нигә артуын ачыклау мөмкин түгел.
24 февраль кичендә Украина премьер-министры Денис Шмигаль Чернобыль атом электр станциясен Беларустан бәреп кергән Русия хәрбиләре басып алуын белдергән иде.