Törkiädä PKK belän iminlek köçläre arasında bäreleşlär däwam itä

Törkiäneñ könçığışı belän könyaq-könçığışında idänastı Körd partizan oyışması PKK partizannarı belän iminlek köçläre arasındağı bäreleşlärneñ tuqtağanı yuq. Ütkän atnadağı bäreleşlärdä 14 PKK partizanı üterelgän ide. Şulardan 4-neñ Diyarbakırda ütkärelgän cinaza yolasında tärtipsezleklär çıqtı. Kördlärneñ ber öleşe şundıy cinaza, bäyräm kebek yolalarnı propaganda öçen faydalanalar. Misalgä 21 Marttağı Näwruz qotlawlarında da tıyılğan PKK bayraqları belän xökümgä tartılıp törmädä totılğan PKK-nıñ citäkçese Abdullah Öcalannıñ zur räsemnären kütärgän, anı yaqlağan şiğarlar äytelgän ide. Buyulı Diyarbakırda cinazä yollasına qatnaşqan 5 meñ tiräse keşe şulay uq Öcalannı yaqlağan şiğarlar qıçqırdılar häm 70 xätle magazinğa taşlar, kerosin tutırılıp qabızılğan şeşälär belän xöcem ittelär. Şuşı xöcemnär arqılı 3 banka binası belän ber şifaxanä dä zian kürde. Moña säbäp isä kibet xucalarınıñ 4 partizannıñ cinazası säbäple Danidän tapşırğan Roj TV-neñ “kibetläregezne yabığız” digän boyrığın tıñlamawları buldı digän qaraş bar. Batman belän Adanadadağı cinaza yollarında da tärtipsezleklär çıqtı. Hürriyet gazetası da bu tärtipsezleklär öçen üz ilendäge Roj TV-neñ tapşıruların tıymağan Daniä premire Rasmussenne cawaplı kürep, “tärtisezläklär sezgä bağışlana” dip yazıp çıqtı. Diyarbakırdağı tärtipsezleklär berse köndä dä däwam itte. Buyulı alğı saflarğa balalarnı sörgän demonstrantlar bigräktä räsmi dairälärgä xöcemnär oyıştırdılar. Diyarbakırdağı AK partiä binası da qullanılmaz xälgä kilde. Räsmi belderülärgä kürä, 36-sı politsiä 42 keşe cäräxätlände. Räsmi bulmağan sannar isä yözne aşa. Yaralanuçılar arasında ike jurnalist ta ber bar, bere bik awır xäldä. Diyarbakır Bälädiyä räise Osman Baydemir “Politsiä kire çigensen, xalıq ta öyenä qaytsın” digän möräcägät yasadı. Millät Meclese Räise Arınç” bolar xalıq kütäreleşe yasarğa mataşalar” dide. Cığışı belän üze dä Kört bulğan Eçke Eşlär Ministere Aksu xalıqnı tınıç bulırğa çaqırdı. Tışqı Eşlär Ministerlege Roj TV-neñ bu tärtipseleklärdäge rolen tikşerä. Diyarbakır üle ber şähärgä äwrelde. Diyarbakırdan tış Siirt, Mardin, Batman, Elazığ, Şanlı Urfa häm Malatya kebek Körtlär küpçelektä bulğan şähärlärgä östämä iminlek köçläre cibärelde. Küpçelek bu waqiğälär qurqınıçraq tös almasın dip qurqa.

Äxtäm İbrahim, İstanbul