“Cide yoldız” 7 meñ tatarnı oçraştırdı

Ğomumän, möxtäräm tıñlawçılar, Qazanda cır janrı aktual' häm populyar. Yäkşämbe “7 yoldız” uzsa, sişämbe könne “Tatarstan” jurnalınıñ baş möxärrire Rifat Fättäxov kürenekle cırçı İlham Şakirov belän Räşit Wahapov festivale turında brifing ütkärä. Ä “Bars Media” “Tatar cırı” festivale ütkärü buyınça eşlär başlağan inde.

7 meñ tatarnı ber tübä astına cıyğan “7 yoldız” festivalen dönyanıñ törle qitğalarında yäşägän tatarlar qayçan kürä alaçaq soñ? Uzğan yılğı berençe festival' turı efirda kürsätelgän ide bit. Ä monısı yuq. Bu sorawğa “Yaña ğasır” teleradiokompaniäse general' direktorı urınbasarı Miläwşä Aytuğanova bolay dip cawap birde.

Bu versiäne bezgä montajalarğa kiräk. Eşne betergäç, bez anı älbättä bezneñ tamaşaçılarğa äytäbez, qayçan efirda bulaçağın. Yaqınça may ayı urtalarında birerbez dip uylıym.

Älegä bu festival'ne üz küzläre belän barıp kürä almağannar, bıyılğısı närsäse belän ayırılıp tordı ikän dip anda bulğannarğa sorawlar yullıy. Mädäniät ministrlığı, “Yaña ğasır”, “Tatmedia”agentlığı, Bötendönya tatar kongressı Başqarma komitetı tarafınnan oyıştırılğan festival' alıp baruçılarğa bay buldı. Ber-ber artlı 4 par säxnägä kütärelde. Annan da qala, Tatarstan premyerı urınbasarı, mädäniät ministrı Zilä Wälieva äytüençä, bu televizion cır festivaleneñ qolaçı da kiñäyä.

Äle ikençe märtäbä genä Qazan Xalıqara 7 yoldız festivalen cıya. Anıñ qatnaşuçılarınıñ geografiäse tağın da arttı. Seneğal, Qıtay, AQŞ häm başqa illärdäge tatarlar bügen säxnädä. Tatarstandağı berdän- ber 7 meñ tamaşaçı sıydıruçı zalğa cıyıluığız festival'neñ kiläçägeneñ yaqtı buluın isbatlıy.

Çınnan da Seneğallı Nadioba xäzerge waqıtta Xel'sinkida yäşäwçe avtor-başqaruçı Cämilägä quşılıp cırlap xäyran ğına tatar süzläre dä öyränergä ölgergän. Nadiobanıñ mäşhür fin gitaraçası Hasse Walli belän bergä başqarğan “Bamba” cırı Afrikada çın xitqa äylänep, Yevropa xit paradında üz waqıtında 9 nçı urınğa kütärelgän bulğan. Qazan tamaşaçısı anıñ Cämilä belän bergä başqarğan “Zäk-zäk”gen dä yaña üzençälek bularaq qabul itte. “7 yoldız” qunağı – “A- Studio” törkeme dä tatarça cır äzerläp kilgän ide. “Premyer-Ministr”nıñ elekkege törkeme wäkilläre dä tatar xalqınıñ “Kübälägem” cırın büläk itte. Ämma qunaqlarınıñ çığışına tamaşaçınıñ da, säxnädä cırlağannarnıñ da fikere ber törle genä bulmadı. Novosibirskidan kilgän “Läysän” törkemennän Ğäysä Xösnetdinovqa bu çığışlar bik ük oşap betmägän ikän.

Alar tatarça berär cır cırladılar. Minem äytüemçä, bezneñ Qazanda, Tatarstanda Atqazanğan cırçılar bar, tanılmağan cırçılar bar. Şular kübebräk bulsın ide. Şul minem küñelemne bik qırdı. A-studiä alar tatarça cırlıylar, ämma tatar telen bozalar ğına.

Tamaşaçı Törkiädän Äxmät Äxmätov, Şvetsiädän Gölüzä Zıyatdin, Almaniädän Güzäl Qormayıva, Qıtaydan Äxmätcan Torsıntay, Latviädän Lena Gäzizova, Ukrainadan Lenie İzmaylova cırların, Amerika Quşma Ştatlarınnan Mäsğudä Şämsetdinova mönäcätlären, üzençälekle bizäk bularaq qabul itte. Mäskäw yäşäwçe Näzifä Kärimova icat itkän, Nailä Fatıyxova häm Mäskäwlelär başqaruında “Bez uyandıq” digän cırnı isä tamaşaçı bügenge milli sänğäteneñ töp fikere bulırğa layıqlı dip qabul itte. Döres, qısqa ğına waqıt eçendä 5 säğättän artqan tamaşanı, andağı çığışlarnı söyläp beterep bulmıy. Cır sänğätenä bitaraf bulmağan tamaşaçığa inde “Yaña ğasır” da bulaçaq televersiäne genä kötärgä qala.

Nail Alan.