Tufan Miñnullin, üze äytüençä, 4 tapqır ütkärelgän bäygeneñ berençesendä qatnaşmağan. İkençesendä berençe häm öçençe urınnarğa layıq bulğan. Ä şimbä könne isä, Qamal teatrında ütkän çarada aña mädäniät ministrlığınıñ maxsus büläge Gran-pri häm ikençe urın birelde. Şul uq waqıtta, 2007 yılnıñ jyuri törkemenä kerüe dä iğlan itelde. Dimäk, Xalıq yazuçısı aldağı bäygegä üzeneñ äsären täqdim itä almayaçaq.
Minem öçen genä kölkele äyber buldı ul. Läkin, töbendä anıñ matur äyber yatmıy. Dimäk minem belän yarışuçılar bulmağanğa kürä, barıber prizlı urınnı ul alaçaq, dip kiräkmägän süzdän qotılır öçen. Bälki üzläre genä qalğaç, bütännär äybät p'yessa yazarlar bälki, digän äyber yata töbendä. Minem yarışasım kilä. Nişlätäseñ. Yarışu-yäşäw. Köräşsennär menä qarıyq. Min qatnaşmıym. Närsä bulır. Ägär dä bezneñ teatrğa, dramaturgiägä yaxşılıq östi ikän… Min teläsä- närsägä riza. Läkin mine berkem yazudan tuqta almıy. Minem çirem inde ul. di Tufan Miñnullin. 5- nçe bäygedä kemnär qatnaşır, niçä äsär täqdim iteler, ansı waqıt qulında. P'yessalarnı jyuriğa 31 dekabergä qädär kiterep beterergä genä kiräk. Ä menä soñğı “Yaña tatar p'yessası-2006” ğa barlığı 31 pyesa qabul itelgän bulğan. İkençe turğa 16 äsär ütep, şularnıñ 7- sen jyuri finalğa çığarğan. 1-nçe urınnı häm 100 meñ sum külämendäge aqçanı isä "Suğan çäçäge" äsäre öçen yäş dramaturg, Qazan däwlät mädäniät häm sänğät universitetı studentı İlgiz Zäyni aldı. Zäynineñ aldağı bäygelärdä qatnaşqan "Mäxäbbät turında söyläşik" p'yesası Qamal teatrında quyılğan ide inde.
Berençe urınnı alğan İlgiz Zäyniev äle student qına. Min anıñ öçen quandım. Ücätlänep yaza. Äle añarğa yegerme niçä genä yäş. Bulır ber waqıt äybät şäp dramaturg. dip zur ömetlär bağlıy aña Tufan Miñnullin. Jyuri öçençe urınnı "Täräzägä yeget kilgän" komediäse öçen Foat Sadrievqa birde. Bu äsär, Qamal teatrı artistı İldar Xäyrullin äytüençä, bäygedä berdänber komediä äsäre bulğan. Qızıqsındıru büläklären isä, Läbib Leronnıñ “Kügärçennär”ye, Näzifä Kärimovanıñ "Aq ärem çäçäge" häm Rädif Säğdineñ "Baqçasaray gölläre" aldı. Alarnıñ uñışı 30- ar meñ sum aqça belän bäyälände. Bäygedä ciñgän äsärlär säxnägä quyılaçaq. Gran-prinı alğan “Mulla” draması turında Tufan Miñnullin bolay dide. Aştan aşqa yörep, Qor’än ayätläre uqıp sawaplı eş eşläp yörü genä tügel. Alar xäzer tärbiäçe rolen dä ütärgä tieşlär. Bezneñ cämğıyätneñ eşlänep betmägän eşlären dä alar eşlärgä tieşlär. Minem şul turıda uylanularımnıñ näticäse ul.
Nail Alan
