Soñğı atnada da Törkiäneñ kön tärtibendä ğomum saylawlar häm terrorçılıq mäs’äläre bar ide.
Tışqı eşlär ministrı häm premyer-ministr urınbasarı Abdullah Gül Ğiraqnıñ tönyağına xärbi operatsiya ütkärelü mäs’äläsendä parlamentnıñ saylawlar aldınnan cıyıluı häm kürsätmä çığaruı ixtimalınıñ da bula aluın äytte. Gül: “İñ yaxşıdan iñ naçar ssenariyğa xätle böten plannarnıñ östäldä buluına” işarä itep: “Läkin böten bolarnı cämäğätçelek häm matbuğat aldında söyläşä başlasaq, uñışsız bulırbız, çönki biredä xärbilärebezneñ iminlege turında süz bara, böten bolarnı da uylarğa kiräk. Ämma bu köräşne yasamasağız, ul çaqta tağın da zurraq qayğı-xäsrätlär yäşäner,” – dip belderde.
Terrorçılıq belän köräşneñ xärbi häm politsiya tışındağı faktorlarınıñ da ähämiyätenä iğtibarnı yünältüçe ministr Gül: “Diyarbakırda soñğı 3 yılda 100 awılğa su birelgän. Törekçä öyrätmägän keşedän närsä kötärgä bula? Berençe tapqır bez balalarğa törekçä öyrätäbez,” – dip açıqladı.
Şul uq waqıtta saylawaldı cıyınnarı da esse hawalarğa qaramastan däwam itelä. Partiyälär uram cıyınnarın ğadättä töştän soñ kiçkä taba ütkärä. Partiya liderların tıñlaw öçen cıyılğan xalıqqa isä qoyaştan saqlanu öçen buşlay cäyge baş kiyemnäre, qulçatırlar häm su taratıla.
İñ esse könnären yäşäwçe Törkiyädä bu atna axırınnan başlap cılılıq üz ğadäti torışına keräçäk, dip xäbär itelä. Antalyada 45 däräcä-graduska citkän hawa cılılığı äkrenläp 6-8 däräcägä töşä başlıy. Törkiyäneñ qayber töbäklärendä xätta yawım-töşem dä kötelä.
Säğit Xäyri, Änkara