Vladimir Putingä eş ezläwçelär anı inde kem genä itmäde - Duma citäkçese urınına da qıstap qaradı, xökümät başlığı itep bilgeläwne dä täqdim itte, İminlek Şurasın nığıtıp, Putinne anıñ başına quyunı tikşerde, xätta nindider añlaşılmağan "ilküläm citäkçe" digän maxsus ber däräcä dä uylap çığardı.
Comğa könne Rusiä mäğlümät çaraları Putingä yaña urın taptı - Exo Moskvı radiosı xäbärenä qarağanda, kiläse atnada Rusiä prezidentı räsmi säfär belän Belaruskä barıp, anda Aleksandr Lukaşenka belän, Rusiä häm Belarusne berläşkän däwlät itüçe Konstitutsiä Aktın imzalayaçaq, şunnan soñ ul älege yaña däwlätneñ prezidentı bulaçaq, ä Lukaşenka isä parlament citäkçese känäfienä utıraçaq.
Şuşı xäbären Exo Moskvı Belarus prezidentı idaräsendäge çığanaqlarğa nigezlänep tarattı. Ämma Azatlıq radiosı belän söyläşkändä, prezident Lukaşenkanıñ matbuğat xezmäte wäkile Pavel Lyohki, andıy xäbärlärgä bik aptırawın äytte:
"Exo Moskvı tarafınnan taratılğan xäbär anıñ namusında qalsın. Bu mäğlümätneñ fäqät Rusiä çığanaqlarında ğına dönya kürüe säbäple, anı Rusiä yağı añlatsın. Bezdä bernindi dä andıy mäğlümät yuq, häm bez Lukaşenka belän Putin arasında wäkalätlärne bülü, yäisä Konstitutsiä aktları imzalaw turında berni işetmädek. Bez moña bik aptıradıq häm moña zur şik belän qarıybız", dide Belarus prezidentınıñ matbuğat wäkile, Putinneñ Minskigä kilep Belarus belän berläşü qäğäzlären imzalawı häm kiläçäktä yaña däwlätneñ başlığı bulu ixtimalı turında.
Minski söyläşülärendä nigezdä budjet mäs'äläse qaralaçaqKiläse atnada, dikäbrneñ 13-14endä Rusiä prezidentınıñ çınnan da Minskigä baruı qaralğan. Ämma Mäskäw, anda berläşkän däwlät qoruğa qarağan bernindi dä räsmi qäğäz imzalaw planlaştırılmağan, yaqlar fäqät büdjet mäs'äläsen genä tikşeräçäk, dip belderä.
İkeyaqlı söyläşülärdä berläşkän däwlätneñ nindi bula aluı turında süz çığa ala, älbättä. Ämma älegä Minskidä dä, Mäskäwdä dä, kiläse atnadağı oçraşuda berlekne qoruğa yünälderelgän yaña konkret ğämällär qaralmağan, dip kilälär.
Ä inde büdjetkä kilgändä, Rusiä häm Belarus arasında qorılaçaq yaña däwlätneñ finansları yıldan-yıl arta bara. Bıyıl ul 4 milliard 300 million sum ide, kiläse yılda anı 5 milliardqa citkerü qaralğan.