Noyaber ayında İzrail häm Fälestin citäkçele AQŞ prezidentı George Bush belän bulğan oçraşuda solıx söyläşülären yañartırğa kileşkän ide. Düşämbe könne taraflar ikençe märtäbä oçraştı. Xäbärlärgä qarağanda, älegä söyläşülär ber näticä dä birmägän.
İzrail turism idaräse bıyıl Raştuağa Bäyetlähämgä 20 meñläp keşe kiler dip farazlağan ide. Bu – uzğan yıl belän çağıştırğanda ike tapqır artıq. Kilüçelär arasında – dini keşelär, amerikan turistları häm balalar küp. Braziliädän 28 yäşlek Tiago Martins isemle yeget, Washington Post basması xäbärçesenä, "min Annapolista tınıçlıq söyläşülären yañartu turında kileşengäç berençe märtäbä Bäyetlähämgä kilergä qarar ittem," dip söyläp birgän.
Xalıq çın küñeldän,söyläşülärne yañartu – töbäkkä solıx kiteräçäk, dip ışana. Raştua çirkäwenä cıyıluçılar bıyıl uzğan yıllar belän çağıştırğanda, käyef tä başqa törleräk, hawada tınıçlıq häm räxätlek sizelä, dip söyläde jurnalistlarğa....Bu tınıçlıq häm räxätlekkä nigez barmı soñ äle?
Düşämbe könne İzrail häm fälestin aradaşçılarınıñ ikençe oçraşuı buldı. Näticäse şul uq – İzrail fälestinnärneñ üz cirläre dip sanağan cirdä tözeleşne däwam itärgä cıyına häm fälestinnärneñ qorallı törkemnärne yuq itüen taläp itä.
İzrail Könçığış İerusalimnıñ Har Homa isemle yähüd bistäsendä 300 yort tözü plannarı turında küptän iğlan itkän ide. Fälestin yağı – bu plannar 2003nçe yılda AQŞ ximäyäsendä qabul itelgän "yul xaritası" programmasına qarşı kilä, dip däğwa itä. Solıx urnaştıru öçen tözelgän bu programmada İzrailneñ fälestin cirlärendä tözeleşne tuqtatuı turında süz bara. Fälestin yağına taläp isä – suğışçan eşçänlekne tuqtatu...
Här taraf ta üz eşlären qanuni dip sanıy häm baş tartırğa cıyınmıy kebek kürenä. Ämma diplomatik tırışlıqlar, söyläşülär däwam itäçäk. Bu atnada İzrail premyer-ministrı Ehud Olmert häm fälestin xakimiäte prezidentı Mähmüd Abbasnıñ oçraşuı kötelä. Bäytlehämdä isä tınıçlıq sorap doğalar qılına.
Bäyetlähämgä Raştua xacına kilgännär tınıçlıq sorap doğalar qıldı. Bıyıl Yaqın Könçığışta tınıçlıq urnaşuğa ömetlär artqan ide.