Rusiädä British Council eşçänlege tiräsendä qupqan ğawğanı yaqtırtıp, britan mäğlümät çaraları ber dä ikelänmi ikeyaqlı mönäsäbätlärneñ yänä "salqın suğış" çorına qaytuı turında belderä.
Çınnan da, FSBnıñ British Council bülekçälärendä eşläwçe cirle xezmätkärlär belän "añlatu eşlären" başlap cibärüe häm alarnı "britan provokatsiälärennän saqlap qalırğa" tırışuı onıtıla başlağan sovet däweren xäterlätä diärgä bula.
Moña qädär British Councilnıñ Rusiädäge eşçänlegen awızlıqlaw tırışlıqların Rusiäneñ tışqı eşlär ministrlığı ğına alıp barğan ide, xäzer inde mäydanğa yaña uyınçı çığa häm anıñ Rusiä xalqına yoğıntı yasıy alu mömkinlekläre küpkä dähşätleräk.
British Council nigezdä bar dönya buylap ingliz telen uqıta Bar dönya buylap britan mädäniäten häm ingliz telen propagandalaw eşen alıp barğan British Councilnıñ Rusiädäge macaraları uzğan yıl azaqlarında başlandı. Britan xakimiätläreneñ Aleksandr Litvinenkonı üterü eşen tikşerüe häm bu uñaydan xäzer Rusiädä yäşägän ayırım keşelärne ğäyepläwe Mäskäw belän London arasındağı mönäsäbätlärne şaqtıy suıttı häm Rusiä üz yağınnan britannarğa üzençä cawap birü yulların tikşerä başladı.
Rusiäneñ küp kenä şähärlärendä yıllar buyı eşläp kilgän British Council kötmägändä bu eşen qanuni nigezgä qormawda, tieşle salımnar tülämäwdä, diplomatik wäkilçeleklär tübäse astında eşläwdä ğäyeplände häm aña 2007neñ azağına qädär yä bu eşen tärtipkä salu, yä tulısınça yabu taläbe quyıldı.
Britan yağı Rusiäneñ şul taläben kire qaqtı, yaña yıl yalları ütü belän British Councilnıñ Mäskäw häm Piterburdağı bülekçäläre yänä açıldı häm bu Mäskäw yağınnan yaña çikläwlär kertügä kiterde. Britan ilçese tışqı eşlär ministrlığına çaqırtılıp, aña britan konsullıqlarında eşläwçe diplomatlarğa akkreditatsiä kiläçäktä birelmiäçäge äytelde.
British Councilnıñ Piterbur bülege citäkçese Stephen KinnockBritish Councilnıñ Rusiä xezmätkärläre belän "añlatu eşläre" alıp barudan tış, şuşı oyışmanıñ Piterburdağı citäkçese britan watandaşı Stephen Kinnock çärşämbegä qarşı töndä iserek kileş maşina yörtüdä ğäyeplänep qısqa waqıtqa ğına totqarlandı häm tieşle berketmä tözelde.
Britaniä xökümäte Rusiädä barğan şuşı säyäsi uyınnar uñayınnan, British Council xezmätkärlären ezärlekläwne bik citdi aluın äytte. Tışqı eşlär ministrı David Miliband:
"Min British Councilnıñ baş mödire belän wäzğiät xaqında söyläşäm, xezmätkärlärne tübänsetü häm qurqıtu berniçek tä qabul itärlek tügel", dip belderde.
Ministr Milibandnıñ urınbasarı çärşämbedä Britaniä tışqı eşlär ministrlığına Rusiäneñ Londondağı ilçesen dä çaqırtıp söyläşte.