Şulay itep, NATOnıñ Ukraina häm Gruziä turındağı eçke bäxäse bu ike ilgä älegä qorı wäğdälär birü belän genä tämamlandı.
Kiev häm Tiflis isä üzlärenä Äğzalıqqa ireşü planı bireler dip ömetlängän ide. Şuşı mäs'älä NATO illäre arasında yänä "iske" häm "yaña" Yewropağa bülenügä kiterde.
NATOnıñ Buxarest oçraşuı äle Ğiraq suğışı aldınnan uq kürenä başlağan şuşı büleneşneñ çınnan da tirän tamırlı buluın kürsätte - NATOnıñ nigezdä Germaniä häm Fransiä tiräsendä tuplanğan iske äğzaları berlekkä Ukraina häm Gruziäne dä alu ixtimalına şaqtıy salqın qarıy bulıp çıqtı.
Ä menä distä yıllar buyı sovet zalimiäte astında bulğan "yaña" Yewropa, yäğni qitğanıñ könçığışındağı illär, kiresençä, Kiev häm Tiflisneñ NATOğa quşılu omtılışın añlap wä xuplap qarşı alğan ide.
Alarnı bu mäs'älädä Quşma Ştatlarnıñ prezidentı Bush ta äwzem yaqlap çıqtı, anıñ fikerençä, Könbatış Ukraina häm Gruziägä kiläçäktä NATOğa quşıluğa kiterä alırlıq Äğzalıqqa ireşü planın täqdim itärgä tieş:
"Biredä, Buxarestta bez NATOnıñ Gruziä wä Ukraina omtılışların xuplawın kürsätergä häm alarğa äğzalıq maqsatına ireşü öçen açıq yul täqdim itärgä tieş. Minem ilneñ qaraşı mäğlüm - NATO Gruziä häm Ukrainanı Äğzalıqqa ireşü planı belän sälämlärgä tieş", digän ide amerikan prezidentı.
Ämma Bushnıñ şuşı belderüe genä citmi bulıp çıqtı NATO oçraşuında. Oyışmanıñ baş sekretare Jaap de Hoop Scheffer, Tiflis häm Kievkä kiläçäktä NATOğa quşılunı wäğdä itsä dä, oyışma eçendä bu xaqta älegä urtaq qararğa kilenmäde, dip belderde.
De Hoop Scheffer süzlärenä qarağanda, Gruziä häm Ukrainağa inde bügennän ük Äğzalıqqa ireşü planın täqdim itäse urınğa NATO cıyınında ike ilneñ şul planğa ğarizaların ğına xuplap çığası itkännär.
Ä inde plan üze NATO illäreneñ tışqı eşlär ministrları tarafınnan da birelä alaçaq, bu mäs'älä şuşı yılnıñ dikäbrendä qaralaçaq, alarğa tieşle wäkalät inde birelde, di NATO baş sekretare.
Mäğlüm ki, Ukraina häm Gruziäneñ NATO yulına basuına qarşı kisken räweştä Rusiä çığıp kilde. "İske" Yewropadağı illärneñ, şul uq Fransiä häm Germaniäneñ qarşılığı da öleşçä alarnıñ Mäskäw belän aralarnı saqlap qalu niätennän çığa, di belgeçlär. Ämma töp säbäp itep Berlin dä, Paris da, Gruziäneñ üzendäge Abxaziä häm Könyaq Osetiä belän araların caylap beterä almawın, ä Ukrainada isä NATOğa kerüne yaqlawnıñ xalıq arasında bik tübän buluın kiterä.
"Alar (Ukraina häm Gruziä) älegä NATOğa kerügä äzer tügel", dip qırt kiste Fransiä prezidentı Nicolas Sarkozy Buxarestta, ämma ul berük waqıtta kiläçäktä şuşı ike ilne dä NATOğa alu bik mömkin digän işarä dä yasadı.