Qıtaynıñ Fuyang qalasında virustan 22 bala ülde. Sälämätlek saqlaw räsmiläre xalıqnı tiz taraluçan bu çirdän saqlanırğa çaqırdı.
Qıtaynıñ sälämätlek saqlaw ministrlığı üzeneñ internettağı säxifäsendä böten vilayätlärdäge bülekçelärenä aşığıç çaralar kürergä quşuın yazıp çıqtı. Uzğan yıllarda da oçrağan bu virus bıyıl iñ küp taralıp epidemiä däräcäsenä citär digän borçılu bar. İñ awır aylar – yün häm yül ayları bulırğa mömkin.
Qul, ayaq häm awız eçe awıruı dip atalğan bu çir – yoğışlı çir, keşedän keşegä ul tökerek çäçräp tä yoğa ala. İñ tiz anı balalar eläkterä häm bu awıru baş mie yalqınsınuına kiterä ala, di belgeçlär.
Sälämätlek saqlaw ministrlığı belgeçe Li Şuang Jie, comğa könne televideniedä çığış yasap, bu çirne yoqtırğan olı keşelär üzläre awırmasqa da mömkin, ämma anı balalarğa yoqtırırğa mömkin, dip belderde.
Mart ayınnan birle Anhui vilayätendäge Fuyang şähärendä bu çirdän 22 bala ülgän. 1 mayğa awırğannarnıñ sanı 3300 citkän, alarnıñ 980ne – xastaxanädä, dip xäbär itelä. 60lap keşe awır xäldä, di tabiplar.
Kürşedäge tağın ike vilayättä awıruçılar sanı terkälgän, ämma anıñ da Enterovirus 71 çire buluın äle xäzer belgeçlär açıqlarğa tieş.
2 may comğa könne könyaqkönçığıştağı Guangdong vilayätendä yäş yarımlıq bala ülde. Bu inde çirneñ könyaqqa taba taraluın kürsätä, di tabiplar. Xinhua mäğlümat agentlığı xäbär itüençä, balanıñ näq şul qul, ayaq häm awız eçe çirennän ülgäne açıqlanğan.
Bu xäbär Qıtay xökümätenä avgust ayında Olimpiä uyınnarına äzerlängändä genä tağın ber zur problema tudırdı.
Epidemiä 2003 yılda bulğan dönyağa şawlağan SARS çire taraluın iskä töşerde. Ul çaqta Qıtay ul çirneñ üzendä tarala başlawın yäşerep wazğiätne nıq qatlawlandırğan ide. SARS belän, yağni xalıqqa kübräk "qoş kizüe" bularaq bilgele bulğan çir belän 30lap ildä 8 meñgä keşe awırdı, 750läp keşe ülde.