Törkiä qızıq ber ilgä äwrelde. Soñğı yılda prinsipta xökümät qaramağında dip bäyälängän däwlät organnarı xökümätkä qarşı qatı eçtälekle tänqitle belderülär yasıy başladılar. Bu da säyäsät ölkäsendä eşlärneñ yaxşı barmawına işarä itä.
21-nçe Mayda Yuğarı Mäxkämä räislegeneñ barlıq ağzaları da qul quyğan xökümätne justitsiäneñ eşlärenä tıqşınuda gäyeplägän ber belderü iğlan itelde. Xökümät tä şuluq könne bu belderügä justitsiä apparatı xoquq normaların säyäsiläşterä, oppozitsion partiä kebek xäräkät itä digän şundıy uq qatı eçtälektä xökümät belderüwe yasadı. Yuğarı mäxkämäneñ belderüwen xuplağan, häm moña qarşı çıqqannar buldı. Mätbuğatnıñ ber öleşe soñğı çiktä monıñ bulaçağı bilgele ide, xökümät AB citäkçelären üz artına alıp, törek yustitsiäsenä basım yasıy başladı digän fikerlär belderde. Ä xökümät yaqlı mätbuğat isä yustitsiä apparatı bitaraf bulırğa tiyeş, ä säyäsi ber ağımnı yaqlaw pozitsiäsenä küçmäsen digän fikerlär äytä häm yaza başladılar. Yuğarı Mäxkämäneñ şuşı belderüwe säyäsät säxnäsen genä tügel, İstanbul birjasın da dulqınlandırdı. Birjadağı aksiälärneñ bäyäse ber niçä protsentqa töşte, Amerikan dollarlı belän Euronıñ bäyäse beraz kütärelde.
Dinçe yäğni islamça qäğidälärne äkrenläp däwlät tormışına da kertergä tırışqan AK partiä xakimiäte belän dinne däwlät eşlärennän ayıru prinsipında qatı torğan laisizm taraftarları arasındağı tartış inde niçä yıllardan birle däwam itä. Monıñ berençe citdi çağılışı prezident saylawlarında üzen kürsätte. Yaña prezident Abdullah Gülneñ, premier Erdogannıñ häm barlıq ministerlärneñ xatınnarı başların islamça bäyläp, başyawlığı belän yörilär. Alar räsmi oçraşularda da şuşı räweştä, yäğni başların açmıyça qatnaşa başaldılar. Monnan tış xökümät oppozitsiädäge Millätçe Xäräkät Partiäseneñ dä yaqlawına ireşep universitetlarda başyawlığı belän uqu irege kitergän konstitutsiäneñ ike maddäsen üzgärtü uñışlığına ireşte. Bu mäs`älä xäzer konstitutsiya mäxkämäsendä qarala, ozaqlamıy näticäse çığacaq. Monnan da möhimräge AK partiä östennän konstitutsiäneñ laisizm prinsipların bozuda ğäyepläp xökem protsesı başlandı. AB-neñ törle organnarı belän Avropa xökümätläre citäkçeläre AK partiä yabılmasın digän basım yasıy başladılar. Qısqası il eçendän dä çit illlärdän dä konstitutsiä mäxkämäse ağzalarına basım yasala başlandı. AK partiäne yabu buyınça barğan xökem protsesı yuridik ber vaqiğä buludan çığıp, añarga säyäsi ber tös birelde. Inde bu turıda qarar biräçäk konstitutsiä mäxkämäse ağzaları qararnı üz vıcdannarına kürä birü mömkinlegen yuğaltılar. Säyäsät säxnäsendä zur ber bilgesezlek bar. Östäwenä ekonomika da yaxşıdan barmıy. Dönya bazarlarında nefte bäyäseneñ bik tiz kütärelüwe, ekonomik torğınlıq häm AK partiäneñ xakimiäte çorında ifrat däräcädä burıçqa batuwı kiläçäk öçen qayğını üsterä. Vaq käsepçelär bülä, eşsezlär sanı arta, inflatsiä üsä. Tege yaqtan PKK belän köräş tä betkäne yuq, här kön sayın diärlek ber-ike soldatnıñ hälak buluwı xäbäre kilep tora.
Barlıq bolar generalştab, yuğarı uqu oyışması, menä ütkän kön dä yuğarı mäxkäme kebek däwlät organnarınıñ xökümätne tänqitlägän, kisätkän belderülär yasawına säbäp bula. Ozın süzneñ qısqası Törkiäne tınıç könnär kötmi.