"Татар-дозор" уены ике теллелекне яклый

Маҗаралы уен быел дүртенче тапкыр үткәрелә, катнашырга теләүчеләр саны елдан-ел арта бара. Квест катнашучылары билгеләнгән маршрут буенча үтеп, төрле-төрле биремнәрне үтиләр.

Квестта катнашыр өчен мәктәп укучылары, студентлар, иҗади коллективлар һәм татар телен, маҗараларны яратучы гади кешеләр чакырылды. Уенда катнашу өчен берничә шартны үтәү мәҗбүри иде:

1. Такымда җиде кеше булуы зарур.
2. “Татарстанның дәүләт телләре турында” канунны бозучы оешмалар исеменә биш хат язу.
3. Татар телендә хата белән язылган элмә такталар, реклама баннерлары, юл күрсәткечләре фотосурәтләрен туплау.
4. “Мин татарча сөйләшәм”, “Татарлар башка планетада”, “2050 елда татарлар” яки “Татарлар турында телсез кино” темаларына багышланган 3-4 минутлык видеоролик төшерү.

Нәтиҗәдә, уенның финал өлешенә ун гариза җибәрүче мәктәп арасыннан алтысы катнашты. Җиңүчеләр 26 апрель көнне узачак “Мин татарча сөйләшәм” концертында бүләкләнер дип көтелә. Такымнарга “Вымпелком” ширкәте тәкъдим иткән бүләкләр тапшырылачак.

Казанда "Татар-дозор 2013" уены үтте