Татарстан башкаласы үзәгендә чәчәк кибетләре эшләп килсә дә, ике телле, милли үзенчәлекләрне исәпкә алып эшләүчеләр юк диярлек. Әлеге бушлыкны Казан федераль университетының югары сәнгать мәктәбен бетерүче Диләрә Гадеева белән Азатлык радиосы укучыларына тарихчы галим буларак билгеле Айрат Фәйзрахманов тутырырга карар кылганнар. 6 февральдә алар Париж коммунасы урамында “Милли” чәчәкләр студиясе ачып җибәрделәр.
“Оешманың тарихи урында, Казанның элеккеге милли сәүдә үзәгендә – атаклы Печән базарында урнашуы һич тә очраклы түгелдер, мөгаен. Бу барлык үзенчәлекләр оешмабызны шундый горур исем - “Милли” исеме белән дип атарга этәргеч бирде”, ди Айрат. Ул гыйлем, сүз, фикер белән генә түгел, эшмәкәрлек белән дә милләткә файда, кешеләргә матур сервис күрсәтергә теләвен әйтте. Ни өчен чәчәкләр студиясе дигән сорауга, “Милли” студиясе оештыручыларның бу юнәлештә үз карашлары барлыгын белдек.
"Безнен чәчәк бәйләмнәребез – матур, кешене сөендеруче, искиткеч формалы, мөhим мәгънәле. Чәчәк бәйләмнәренә үзенә хас булган милли моңы бар дип әйтеп була. Шулай ук студиядә татар телендә котлау хатлары, милли тематикалы кул эшләнмәләре бар.
Бездә һәр сатып алучыга аерым мөнәсәбәт: халкыбыз шикелле без кунакчыл, һәрвакыт сатып алучыны чәй белән, милли ризыклар белән каршы алырга әзер. Студияда сатып алучыларга ике телдә бертигез хезмәт күрсәтелә", ди Фәйзрахманов.
Без аннан татар телле сәүдәгә, милли бизәкләргә ихтыяҗ хакында да кызыксындык. Аның фикеренчә, туган телдәге сәүдә дә сатып алучыларны җәлеп итә ала.
"Бу проект шундый кызыксыну уятыр диеп уйламаган идек. Ачылган көндә бездә берничә дистә кеше булды. Димәк, җәмәгатьчелегебез мондый проектларга сусаган. Беренчедән, бу проектның идеясе эшмәкәрлек идеяларыннан башка, ул социаль мәгънәгә дә ия. Шул ук чәчәкләр турында сүз алып барсак, чәчәкләр ул шундый глобаль күренеш хәзер. Барлык халыкларга, барлык дәүләтләргә дә хас әйбер. Әмма, глобаль күренеш буларак чәчәкләр культурасында ниндидер милли үзенчәлекләр аз дияргә була. Әгәрдә татар мәдәниятен үстерергә телибез икән, мондый глобаль күренешләрдә, глобаль шартларда чәчәкләр булсынмы ул, ниндидер башка әйберләр булсынмы, анда ниндидер милли үзенчәлекләр булырга тиеш дип уйлыйм. Туган телдә алып барылган сәүдә кешеләрне үзенә җәлеп итә", ди Айрат Фәйзрахманов.
"Милли" студиясе яңалыкларын аларның Вконтактедагы төркеменнән күреп була.
Казанда "Милли" чәчәкләр студиясе эшли