16 октябрьдә Чиләбенең җиде мең кеше сыйдырышлы "Трактор" боз аренасы матурлык һәм сәләт бәйгесенә бирелде. Финал тамашасы бик купшы итеп оештырылган иде. Анда катнашу өчен Татарстанның җыр һәм бию ансамбле, Русиянең "Голос" тамашасы йолдызлары, Татарстан артистлары килде. Тамашачылар арасында ул көнне Чиләбегә рәсми сәфәргә килгән Татарстан премьер-министры Илдар Халиков та булды
Дөнья татар конгрессы, Татарстан мәдәният министрлыгы һәм башка оешмалардан да бәйгегә вәкилләр килде.
Без, без, идек, без 12 кыз идек
Бөтенрусия "Татар кызы - 2015" тамашасыннан бер күренеш
Русия төбәкләре бәйгеләрендә җиңеп чыккан кызлар арасыннан финал алдыннан булган өстәмә яршыларда Татарстан, Башкортстаннан, Чиләбе, Түбән Новгород, Удмуртия, Төмән, Кемерово, Томски өлкәләреннән 12 кыз сайлап алынган иде.
Алар профессиональ артистлар белән бер сәхнәдә биеде, җырлады һәм башка саләтләрен күрсәтте, реклама йөзеннән милли итеп тегелгән заманча кием күрсәтте.
Ә аңарчы ярым финалга чыккан кызлар Чиләбедә һәм Казанда сынаулар да үтте. Мәсәлән, Чиләбе Сабантуенда чибәрләр бию, сәхнә осталыгы һәм чигүдән тыш, тракторлар да йөртеп карады.
Бәйгедә катнашучы Алия Әпсәләмова
Шулай ук кызлар тел, тарих һәм әдәбиятне белү ягыннан да ярышты. Казанда булганда үз төбәкләрендә җиңгән Төмән, Түбән Новгород, Уфа, Йошкар Ола һәм башка яклардан чакырылган татар кызлары милли аш-су әзерләүдә осталыкларын, Болгарга барып чигү, тегү һәм башка күл эшләрен күрсәтте.
Шулай итеп бәйгенең бөтен ярышларында иң күп балны Пермь өлкәсеннән Алинә Аптукова җыйды. Оштыручылар сүзләренчә, Барда районы вәкиле баллар саны белән Чиләбедәге төбәк бәйгесендә җиңгән Юлия Юртеева һәм Алия Әпсәләмовадан аз гына алгарак киткән.
Барда кызының җиңүе очраклы түгел
Алинә Аптукова бөтен яктан уңган кыз булып чыкты. Ул йөзе белән матур булудан тыш, профессионал дәрәҗәдә җырлый, милли аш-суга да, тегү-чигүгә дә оста. Ул гомерен музыкага багышлаган, Барда районында музыка мәктәбендә укытучы булып эшли, Казан федераль университетында читтән торып музыка белгечлеге ала.
Җиңүче 400 мең сумлык асыл ташлар белән бизәлгән таҗ һәм "Lada" машинасы белән бүләкләнде. Ул 2016 елга кадәр күп чараларда "Татар кызы" бәйгесен вәкиллек итәргә тиеш була.
Алинә өчен залда аның әти-әнисе, туганнары, дуслары җан атты. Иң булган татар кызлары бәйгесендә "Перм өлкәсе, Барда районы кызының җиңүе очраклы түгел", дип язылган оештыручыларның рәсми хатында. Алинә гаиләсендә дә милли мохит тудырылган, Барда районында да татар, башкортлар гөреф-гадәтләрен бик каты саклап яши.
Финалга чыккан һәр кызга иганәчеләр һәм оештыручылардан берәр исем бирелде.
Чиләбе кызы Алия Әпсәләмова бүләген ала
Чиләбе кызы Алия Әпсәләмова "Иң нурлы йөзле кыз", Төмәннән Анжела Абдрәшитова "Иң камил кыз", Кемерово өлкәсеннән Алсу Алтынбаева "Иң тырыш кыз", ә җиңүче Алинә Аптукова тагын "Иң гүзәл кыз" итеп тә танылды.
Иҗаудан Алисә Әхмәтҗановага "Сандугач телле кыз", Мари республикасыннан Ралина Галимяновага "Иң назлы кыз", Томскидан Зарина Идрисовага "Иң серле кыз", Татарстаннан Миләүшә Морзахановага "Иң нәзәкатьле кыз", Ульяннан Ләйсән Усмановага "Иң илһамлы кыз", Уфадан Альбина Хамматовага "Иң сөйкемле кыз", Челәбенең Чибәркүл районыннан Юлия Юртеевага "Иң нәфис кыз" , Түбән Новгородтан Тәнзилә Смелова "Иң уңган кыз" дигән исемнәр бирелде.
Миләүшә Морзаханова
Ә бәйгенең рәсми сайтында барган тавыш бирүдә Татарстаннан Миләүшә Морзаханова җиңде. Аның өчен 3452 тавыш бирелгән иде.
"Татар кызы" бәйгесе зур итеп Чиләбенең үзендә берничә ел рәттән үткәрелеп килә. Быел Чиләбеләр үз бәйгеләрен ул беренче тапкыр Бөтенрусия дәрәҗәсенә күтәрә алды.
Узган ел 7 декабрьдә Мәскәүдә Русия күләмендә дип игълан ителгән "Татар кызы-2014" бәйгесенә йомгак ясалган иде. Башкортстаннан Алинә Гыйззәтуллина 20 кыз арасыннан бу бәйгедә җиңеп чыкты.
Бөтенрусия "Татар кызы - 2015" бәйгесенең онытылмаслык мизгелләре