Путин: "Аллаһ Төркия җитәкчелеген акылдан яздырып җәзаларга булгандыр"
Your browser doesn’t support HTML5
Русия президенты Федераль җыенга юлламасында Төркия Русиянең хәрби очкычын бәреп төшерүе өчен әле күп тапкыр үкенәчәк дип белдерде. Сүриядәге хәрби чара турында әйтеп, Путин әлеге илдә Русия хәрби көчләренең беренче чиратта Русия өчен сугышуларын белдерде. Ул чираттагы тапкыр Төркия җитәкчелеген Русиядә тыелган "Ислам дәүләте" террор төркемен яклауда гаепләде. Путин сүзләренчә, Төркия җитәкчелеге 24 ноябрьдә Төркия-Сүрия чигендә Су-24 Русия хәрби очкычын бәреп төшергән өчен әле күп тапкыр үкенәчәк.
Анкара гамәлләре турында әйтеп Путин: "Аллаһ Төркия җитәкчелеген акылдан яздырып җәзаларга булгандыр", диде. Русия президенты "помидорлар яки төзелеш ширкәтләре чикләүләре белән генә Төркиянең котыла алмаячагын" ассызыклады. Без сугыш белән янамыйбыз, әмма нәрсә эшләргә кирәклеген беләбез, диде Путин.