Чибәрлек бәйгесе быел да узган елгысы кебек соңга калып башланды. Әллә һава торышының салкын булуы, әллә инде башка сәбәптән "Пирамида" күңел ачу үзәгендә хәйран буш урыннар булуы күзгә чалынды.
Шуны да әйтергә кирәк, 28 катнашучының яртысына якыны татар кызлары һәм жюри әгъзалары арасында да шактый татар булуга карамастан, бәйге бары тик урыс телендә генә барды.
Конкурста катнашучыларның кайбер туганнары да бу хәлгә бәйгедән соң канәгатьсезлек белдерде. Әйтик Алексеевский районыннан бәйгедә катнашкан Ләйлә Вәлиуллинаның әтисе Ирек Вәлиуллин "Татарстанда яшәсәк тә, чара урыс һәм инглиз телләрендә генә алып барылды. Татарстанга суверенитет алдык, "Мисс Татарстан"да татар милләтен зурлап чыгучы да булмады. Бу чара Русиянең башка төбәгендәге бәйгеләрдән аерылмады. Татарстанда үткән шушы бәйгедә татар телен искә алучы да булмады, дип белдерде.
"Татарстан чибәре" бәйгесен оештыручылар, Татарстанда ике дәүләт теле булуын белә торып, күрмәмешкә сабыштылар ахры, чөнки узган елда да шушындый ук хәл күзәтелгән иде.
Узган ел дигәннән, быелгы бәйгедә катнашучыларның саны да, яшьләре дә бераз кимегән булып чыкты. Иң яшь кызга 14 яшь булса, иң олысына 22 яшь иде.
Кызлар жюрига башта классик киемнән үз буй сыннарын күрсәтсә, аннан пляж киемнәрен киеп чыкты. Шушы күренүдән соң жюри 28 туташ арасыннан үзенә ошаган ун кызны сайлап алып финалга уздырды һәм төрле сораулар белән аларның белемнәрен тикшерде.
Быел да төп сорау – Русиядәге икътисади кризиска карата кызларның фикерләре алдан ук видеога яздырылган булып чыкты.
Кызлар Русиянең кризистан чыгуы өчен төрле юллар тәкъдим итте. Кемдер сумны долларга әйләндермәскә һәм үз илеңә тугры калырга тәкъдим итте, кемдер чибәр һәм акыллы кызларга кризисның куркыныч булмавы турында әйтте.
Араларыннан берсе хәтта Казанның Дәрвишләр бистәсендә яшәгәнгә күрә кризисның булмавын, чөнки Дәрвишләр бистәсендәге "мәрхәмәтле" тормышның үзен һәм гаиләсен чыныктыруы турында әйтеп, залдагыларны көлдереп үтте.
Жюри әгъзалары кызларның китап уку һәм башка төр осталыкларын тикшереп алды. Кемдер язучы Ремарк әсәрләрен укуын әйтсә, Софья Мостафина татар язучы Гүзәл Яхина әсәре булган "Зөләйха күзләрен ача"ны укуын белдерде.
Мостафина, бәйгедә катнашучы башка кызлардан аермалы буларак, Казанга багышланган шигырен укып һәм, кинога төшү тәкъдиме булса, Сөембикә ролен башкарыр идем дип бераз татарлыгын хәтерләтеп үтте.
Мостафина чарадан соң Азатлык хәбәрчесенең ни өчен кинога төшәргә тәкъдим булса, Сөембикә ролендә уйнар идегез, дигән соравын урыс телендә җаваплап, Сөембикәнең үзе горурланган татар милләтенең бер чагылышы булуы турында әйтте.
"Татарстан чибәре - 2016" исеме ачыкланыр алдыннан чараның иганәчеләре катнашучылар арасыннан үз чибәрләрен сайлады. Кемдер "Мисс Ривьера", кемдер "Мисс Просто Молоко" кебек иганәчеләрдән махсус бүләкләр алды.
Алексеевский районыннан катнашкан 22 яшьлек Ләйлә Вәлиуллинага "Татар радиосы"ның махсус бүләге тапшырылды.
Азатлык радиосы сорауларын җаваплаган Ләйлә үзе бу бүләкне миңа татар телен камил белгәнгә күрә биргәннәрдер инде, дип фаразлады.
Ул үзе ярышта финалда ярышкан ун кыз арасына керә алмады. Әгәр мин алар арасына кергән булсам, һичшиксез, татар телендә ни дә булса сөйләр идем яисә сорауларга татар телендә җавап биргән булыр идем. Безгә бәйгегә хәзерлек вакытында бары тик урыс телендә генә сөйләшегез дип әйтүче булмады, дип белдерде.
Дүрт сәгатьтән артык барган бәйге ахырында төп җиңүчеләр игълан ителде.
Быел "Казан чибәре" исемен татарлыгын һәр җавабында сиздерергә тырышкан Софья Мостафина, "Мисс фото" исемен Екатерина Грудцова, "Икенче вице-мисс" исемен Ксения Яруллина, "Беренче вице-мисс" исемен Ксения Тимкина алды.
"2016ның Татарстан чибәре" таҗы һәм иганәчеләрнең чәшке туны исә Диләрә Ялалтыновага эләкте.
Диләрә "Русия чибәре" бәйгесендә Татарстанны вәкиллек итәчәк.
"Татарстан чибәре-2016" мизгелләре