Активист Илдар Дадинны Алтай өлкәсенең Рубцовски шәһәрендәге 5нче санлы төрмәгә китереп җиткергәннәр. Якшәмбе ул җәмәгате Анастасия Зотовага шалтыратып ничек китерүләре турында сөйләгән.
Дадинны Карелиядәге төрмәдән 2 декабрь көнне алып киткәннәр, Төмәндә күчүне көткәндә вакытының күп өлеше узуын әйтә. Юлда аның белән яхшы мөнәсәбәттә булганнар, әмма ул киткәч Карелия төрмәсендә янә газаплаулар башланыр дип шикләнә.
Илдар Дадин – Русиядә "урам чараларын үткәрү тәртибен берничә тапкыр бозу" маддәсендә гаепләнеп, төрмәгә утыртылган бердән-бер кеше. Аны ике ярым елга ирегеннән мәхрүм иттеләр.
Дадин ноябрь аенда Карелиядәге 7нче санлы төрмәдә газаплаулар турында белдерде. 5 декабрь аны башка колониягә күчерәчәкләре билгеле булды, әмма аннан соң кайда булуын әйтмәделәр. Активистлар "Дадин кайда?" дигән шигарләр белән теләктәшлек чаралары үткәрде.