"Актуаль булган куркынычлардан без мәгариф системындагы процессларны канунга яраштыру эшен дөрес кабул итмәүче милләтче һәм эктремистик оешмалар тарафдарларының вазгыятьне какшатырга тырышуын күрәбез. Аларның гамәлләрен аерым дәүләт һәм муниципаль хезмәткәрләренең, мәдәният һәм сәнгать эшлеклеләренең кыздырып җибәрүе бигрәк тә борчуга сала. Кисәтеп куям - бу беркая да алып бармаячак, экстремистик гамәлләргә каршы торып кына калмаячакбыз, ә хөкем итәчәкбез, катгый һәм ишетелерлек итеп эшләячәкбез", диде Нәфыйков Татарстан прокуратурасының еллык җыелышында.
Нәфыйков 29 ноябрьдә татар теленә кагылышлы мәсьәләдә бер кисәтү ясаган иде инде. Ул чакта Дәүләт шурасы утырышында мәктәпләрдә татар телен мәҗбүри укытуны бетерүе турында чыгыш ясап, прокурор "канунсыз гамәлләр һәм экстремистик эчтәлекле сүзләр, кемнән чыкса да, катгый рәвештә туктатылачак" дип белдерде.
Ике атна чамасы элек Русия президенты Владимир Путинның Нәфыйковны Дан ордены белән бүләкләвен социаль челтәрләрдә кайберәүләр прокурорның Татарстан мәктәпләрендә татар телен мәҗбүри укытуны бетерүгә керткән өлешен югары бәяләү буларак атады.